Boazodoalu váldošiehtadusa vuođul šiehtadallet stáhta ja Norgga Boazosápmelaččaid Riikkasearvi jahkásaččat boazodoallošiehtadusa. Šiehtadus guoská ekonomalaš váikkuhangaskaomiide mat galget veahkehit juksat boazodoallopolitihka ulbmiliid. Áššebealit sáhttet maiddái gáibidit šiehtadallamiid eará áššiid ektui go dat mat gusket ekonomalaš váikkuhangaskaomiide.

Norgga Boazosápmelaččaid Riikkasearvvi gáibádusa ekonomalaš rámma lea 321,85 milj. ruvnnu. Dat lea 71,85 milj. ruvdnosaš lassáneapmi dálá šiehtadusa ektui.

Norgga Boazosápmelaččaid Riikkasearvvi váldovuoruheamit leat areála, gelbbolašvuohta ja kapasitehta, sisaboađu lokten ja dássen, dálkkádatrievdamat ja dálkkádatheiveheapmi ja čálgodoaibmabijut.

Stáhta bidjá ovdan fálaldaga boazodoallošiehtadusa šiehtadallamiidda ođđajagimánu 26. b. Váldošiehtadusa vuođul galget šiehtadallamat leat loahpahuvvon maŋimusat njukčamánu 1. b.