Boazodoalu Ovddidanfoandda olis galget 2026/2027 šiehtadusjagi vuoruhuvvot prošeavttat mat nannejit máhttovuođu, sihkkarastet guoddevašvuođa ja nanusmahttet boazodoalu dustet boahtteáiggi hástalusaid.

Čuovvovaš suorggit leat dutkan- ja ovddidanáŋgiruššama oktavuođas meroštallojuvvon erenoamáš deaŧalažžan:

  • Dálkkádatrievdamat ja dálkkádatheiveheamit
  • Guohtuneatnamiid goziheapmi
  • Boazodoalu areálaid sihkkarastin
  • Siskkáldas iešstivrejumi ovddideapmi
  • Boraspiret ja boraspirehálddašeapmi
  • Bohccuid dávddat
  • Árbevirolaš ja vásáhusvuđot gelbbolašvuohta

Boazodoalu Ovddidanfoandda doarjagat dutkan- ja ovddidanprošeavttaide galget váikkuhit dasa ahte áigges áigái gustovaš boazodoallopolitihkalaš mihttomearit olahuvvojit. Doarjagat galget lágidit dili dasa ahte ilbmá ođđa ja ávkkálaš máhttu mii boahtá Norgga beale boazodollui buorrin, ja váikkuhit dasa ahte máhttu gaskkustuvvo boazodollui, hálddašeapmái ja servodahkii muđui.

Boazodoallu deaivida dál hástalusaid earret eará dálkkádatrievdamiid, lassáneaddji areálagiččuid ja boraspirevahágiid geažil. Dusten dihte dáid dilálašvuođaid, lea dárbbašlaš háhkat nanu, ođasmahttojuvvon ja máhttovuđot ipmárdusa, mii sáhttá nannet sihke boazodoalu ja hálddašeami. Dutkama olis sáhttit áigái oažžut deaivilet mearrádusaid, boazodolliide eanet einnostahttivuođa, ja buoridit gearggusvuođa ja heivehanvejolašvuođaid. Dutkan addá maid buori vuođu duođaštit ja viidáseappot fievrredit árbevirolaš ja vásáhusvuđot gelbbolašvuođa, seammás go boazodollui lágida vejolašvuođaid gávnnahit ođđa metodaid ja čovdosiid. Oppalaččat lea dutkan guovddáš váikkuhandoaibma dasa ahte lágidit boazodollui guoddevaš ja nanu boahtteáiggi.

Boazodoalu Ovddidanfoanda lea guovddáš váikkuhandoaibma boazodoallopolitihkas ja geavahuvvo ruhtadit doaibmabijuid mat dorjot boazodoalu ovdáneami, nuppástuhttima ja árvoháhkama. Foanda hálddašuvvo boazodoallošiehtadusa ulbmiliid mielde, ja doarju earret eará dutkama, innovašuvnna, gelbbolašvuođaloktema ja investeremiid. BOF addá ekonomalaš veahki čađahit dárbbašlaš ovddidandoaimmaid dakkár ealáhussii masa dálkkádatrievdamat, areálagiččut ja márkandilálašvuođaid rievddadeamit erenoamážit čuhcet, ja lea áibbas dárbbašlaš boahtteáigásaš boazodoalloealáhusa sihkkarastimii. Foanda ruhtaduvvo boazodoallošiehtadusa bokte.