2019/2020 Boazodoallošiehtadusas ásahuvvoje oahppan- ja fuolahusvuđot bálvalusat bistevaš fálaldahkan. «Ut på vidda» (duoddarii) váldoulbmil lea ásahit boazodollui lassiealáhusa mii lea gánnáhahtti boazodoallobearrašiidda. Viidásit lea mihttun ásahit bures heivehuvvon bálvalusaid main lea buorre kvalitehta ja maid oastit jearahit. Dasto lea dehálaš ahte dán bálvalusa geavaheaddjit besset persovnnalaččat ovdánit oahppama, nákcema ja sosiála servvoštallama bokte, ja ahte dat fievrrida buoret ipmárdusa ja máhtu boazodoalu, sámi kultuvrra, historjjá ja árbevieruid birra.

Ut på vidda-fálaldat lea ođđa lassiealáhus boazodoalus. Geaidnu buori ja gánnáhahtti doibmii ja oahppan- ja fuolahusbálvalusaid ovdáneapmái boazodoalus gáibida resurssaid, áŋgiruššama ja beroštumi, sihke ásaheddjiid, Ut på vidda- prográmma ja ealáhusa doarjjaolbmuid bealis. 2026 ođđajagimánus leat 13 dohkkehuvvon boazodoallobearraša geat fállet dákkár bálvalusa. Olbmot leat fátmmastan fálaldaga, ja mánát ja nuorat leat ožžon earenoamáš oahpahusa sámi boazodoalus, kultuvrras ja eallinvuogis. Lassin leat nuppelohkái oahpaheaddji beassan buoridit iežaset gelbbolašvuođa sámi fáttáid birra, ja sii fas fievrridit dan máhtu viidásit sin klássalanjaide ja addet buoret oahpahusfálaldaga máŋgga duhát oahppái jahkásaččat.   

Dálá strategiija- ja doaibmaplána loahpahuvvo 2026:s. Oahppan- ja fuolahusvuđot bálvalusaid stivra galgá dán jagi mielde ráhkadit ođđa strategiija- ja doaibmaplána. Šiehtadanbealit oaivvildit ahte dasa lea guovddáš ášši vuoruhit earret eará doaibmabijuid oažžun dihte eanet fálliid, čalmmustahttima ja márkanfievrrideami dán bálvalussii. Šiehtadanbealit deattuhit maiddái dehálažžan eanet ovttasbargat eará ortnegiiguin boazodoallošiehtadusa ja Inn på tunet olis.