Boazodolliid sadjásašdoarjja buozalmasa oktavuođas ásahuvvo refušuvdnaortnegin mii gokčá sadjásašgoluid bargoaddiáigodagas (1. beaivvi rájes 16. beaivvi rádjái). Refušuvdnaortnet galgá gustot siidaosiide, ja eaktuda ahte siidaoassi vuostáiváldá doarjaga siidaosiid ja boazoservviid doarjjanjuolggadusaid mielde. Doarjjamáksu mearriduvvo juohke siidaoasi njuovvama intervállaid mielde.

Dán ortnegii ráhkaduvvo láhkanjuolggadus mii čilge makkár eavttuid ferte deavdit oažžun dihte doarjaga, ja movt doarjja mearriduvvo. Šiehtadusbealit leat soahpan ahte dán ortnegii várrejuvvo 2,0 mill. kruvnno Boazodoallošiehtadusa 2026/2027 bokte.

Boazodoallošiehtadusas 2026/2027 leat šiehtadusbealit maiddái soahpan viidásetfievrridit máŋga eará čálgoortnega boazodollui buorrin. Earet eará galgá árrapenšuvdnaortnet boazodolliide joatkašuvvat vai geahpedit buolvvaidgaskasaš sirdima boazodoalus, ja vai aktiiva ealáhusdoallit sáhttet luohpat ealáhusas ovdalgo ožžot ahkepenšuvnna álbmotoaju bokte. Maiddái sadjásašdoarjja áhpehisvuođa, riegádahttima, adopšuvnna ja jápmima oktavuođas, doalahuvvo. Dát doarjja galgá nannet ekonomalaš oadjebasvuođa boazodolliide, ja nannet nissonolbmuid sajádaga ja bearašvuđot boazodoalu.

Šiehtadusbealit leat maid ovttaoaivilis joatkit ruhtajuolludusain mii sihkkarastá boazodoallái buohcanruđa mii vástida 100 proseantta buohcanmáksinvuođus. Boazodoallái dahká NAV buohcanruhta 80 proseantta buohcanmáksinvuođus. Ruđat mat várrejuvvojit dán ulbmilii, sirdojuvvojit álbmotodjui.

Boazodoallošiehtadusas 2026/2027 lea oktiibuot 6,4 mill. kruvnno várrejuvvon čálgoortnegiidda, mii lea 2,0 mill. kruvnno eambbo go diimmá šiehtadusas.