Áigu huksehahttit eanet studeantaásodagaid

Ráđđehus evttoha boahtte jagi hukset 1500 ođđa studeantaásodagaid – 200 eanet go dán jagi. Seammás árvalit doaibmabijuid mat galget geahpidit ekonomalaš riska ja buoridit válljenfriddjavuođa olgoriikkastudeanttaide.

 

– Lea hui dehálaš ahte studeanttaide gávdnojit hálbbes orrunbáikkit. Danin áigu ráđđehus lasihit studeanttaviesuid huksema 2015:s, dadjá máhttoministtar Torbjørn Røe Isaksen.

Ráđđehus evttoha juolludit 30 miljovnna ruvnno lassin vurdojuvvon haddegoargŋumii vai vuođđodoarjja studeanttaide  lasihuvvo, nappo oppalaš supmi mii máksojuvvo eanas studeanttaide. Gaskal 2006 ja 2013 lohkandoarjja dušše lassánii vurdojuvvon haddegoargŋuma mielde, ja lassáneamit 2014 ja 2015 mearkkašit sullii 3 proseanta reálalassáneami. Vuođđodoarjja boahtte jagi rájes lea 100 920 ruvnno juohke loahkajahkái.  

Ráđđehus evttoha valuhttariska ektui muddet sihke stipeandda ja loana skuvlaruhtan norgga studeanttaide olgoriikkas. Dál lea dušše stipeanda mii muddejuvvo valuhttariska mielde. Árvalus mearkkaša ahte stáhta guoddá noađi vejolaš valuhttarievdademiin juolludeami rájes dassážii go doarjjasupmi máksojuvvo. Doarjaga máksámuš galgá muddejuvvot sihke ruhtaárvvu láivudeami ja nanosmahttima oktavuođas.

Dál lea nu ahte Loatnakássa dušše juolluda doarjaga vuosttaš jahkái go olgoriikkas váldá njealje jagi bachelor oahpu, dat nu gohčoduvvon freshman-jahki USA:s, jus áigu lohkat oahppobáikkis mii lea maŋŋálaston ovtta golmma buoremus riikkaidgaskasaš oahppobáikkiid listui.

– Ráđđehus oaivvilda ahte dát listtut eai leat doarvái buorit oahppokvaliteahta mihtádussan, ja ahte studeanttain leat buori eavttut árvvoštallat makkár oahpu man áigot váldit olgoriikkas sidjiide lea eanemus ávkkálaš. Danin mii evttohat ahte sáhttit juolludit obbalaš doarjaga vuosttaš jahkái njealji jagi bachelor oahpus, dadjá Røe Isaksen.

Ráđđehus evttoha vejolašvuođa ovttastahttit álbmotoaju buohcanruđaid loatnakássa buohcanstipeanddain.

– Go studeanttat barget lassin lohkamii ja nu háhket buohcanruhta vuoigatvuođaid, de lea eahpegovttolaš jus sii eai sáhte dieđihuvvot buohccin seamma eavttuid mielde go maid earát dahket, cealká Røe Isaksen.

Ráđđehus evttoha lasihit studeanttaid iežasoasi sisriikkalaš ruovttumátkkiid oktavuođas 500 ruvnnuin. Dát dagaha ahte leat studeanttat geain lea guhkes mátki ruoktot geat ožžot mátkestipeandda.

Ráđđehus evttoha lasihit oahppoloana reantolasáhusa 0,25 proseantačuoggáin 2015 ođđajagimánu 1. beaivvi rájes, nu ahte dat šaddá leat 1,25 proseanta. Sivvan lea erohus gaskal Loatnakássa vealgereantu ja priváhta vealgemárkana vealgereantu guhká lea lassánan. Loatnakássa reantoeavttut leat danin dál buorebut go dat mii lei vuođđun dalle go reantomálle ásahuvvui. Reantolasáhus guoská rievdavaš reantu loanaide ja bistevaš reantu loanaide go bistevaš reantu ohcamuš lea boahtán 2014 golggotmánu 8.beaivvi dahje maŋŋil dan beaivvi.

Ráđđehus evttoha geahpidit álbmotallaskuvlla ohppiid doarjaga logi mánu ovcci mánnui danin go duohta oahppojahki dušše bistá ovcci mánu.