Geassá ruovttoluotta feastonuohttegeatnegasvuođaid dieđáhusa
Historjjálaš arkiiva
Almmustahttináigodat Solberga ráđđehus
Almmustahtti: Ealáhus- ja guolástusdepartemeanta
Ođas | Almmustahtton: 19.06.2017
- Dát ášši lea digaštallojuvvon guhká ja Stuoradiggi ii leat nákcen gávdnat buori čovdosa dasa. Guolástusealáhus dárbbaša einnostit ovddasguvlui ja danne lea ráđđehus gávnnahan ahte lea rievttamus geassit ruovttoluotta dieđáhusa, lohká guolástusministtar Per Sandberg.
Ráđđehus lea stáhtaráđis odne ovddidan dan ahte dát dieđáhus dorskenuohttefatnasiid geatnegasvuohtavuogádagaid birra gessojuvvo ruovttoluotta. Stuoradikki bivddii 2016 giđa ráđđehusa ásahit kommišuvnna mii guorahallá buot dan golmma geatnegasvuođa. Kommišuvdna buvttii raporttastis golggotmánus 2016:s, ja ráđđehus ovddidii stuoradiggedieđáhusa geatnegasvuohtavuogádaga birra njukčamánu 17. beaivve 2017:s. Stuoradiggedieđáhusas evttohii ráđđehus loahpahit geatnegasvuohtavuogádaga dan ektui ahte ealáhus buhtada dan goralaččat.
- Geatnegasvuohtavuogádat lea iskojuvvon ja leat geahččalan heivehit dan moanaid logenárjagiid, muhto dat ii leat doaibman. Dan oaivvildit eatnasat. Min evttohusain háliideimmet oččodit loahpalaš čielggadeami. Rápmaeavttut fertejit leat stargasat ja einnosteaddji nu ahte oažžut gánnáhahtti fitnodagaid, birrajagi bargosajiid ja servodatekonomalaš gánnáhahtti doaimma, lohká Sandberg.
Go ráđđehus dál geassá dieđáhusa ruovttoluotta, de dat mearkkaša ahte mis eai leat evttohusaid mot rievdadit geatnegasvuođaid. Dat mearkkaša ahte dálá guoskevaš lágat jotkojuvvojit.
- Dán mii dahkat sin ektui ealáhusas geat ain fertejit doahttalit geatnegasvuođaid, ja eará guoskevaččaid ektui. Joatkevaš eahpesihkkarisvuohta ášši loahpalaš mearrádussii ii leat buorre guhtiige. Otná lágaid mat gusket ealáhussii goit olbmot juobe dovdet, dadjá guolástusministtar.