Nannejit gielddaid fuolahanbálvalusa

Ráđđehus árvala juolludit 92,3 miljovnna, mainna ráhkadit vel 500 olles jándora fuolahansaji 2014. Oktiibuot šaddet 2500 saji. Dan lassin ráđđehus áŋgiruššá gelbbolašvuođa loktema ovdii.

Ráđđehus árvala juolludit 92,3 miljovnna, mainna ráhkadit vel 500 olles jándora fuolahansaji 2014. Oktiibuot šaddet 2500 saji. Dan lassin ráđđehus áŋgiruššá gelbbolašvuođa loktema ovdii.

– Ráđđehus háliida, ahte stáhta galgá váldit stuorát ruđalaš ovddasvástádusa das, ahte gielddat besset lasihit fuolahanbálvalusa gelbbolašvuođa, kvaliteahta ja kapasitehta. Dan lassin, ahte lasihit juolludeami eanet fuolahansajiide, de mii árvalat 52 miljovnna gelbbolašvuođa lasiheapmái, dearvvašvuođa- ja fuolahanministtar Bent Høie dadjala.

Dán áigge fuolahanbálvalusain leat sullii 65 000 bargi, geain ii leat dearvvašvuođa- ja sosiálafágalaš oahppu. Árvaluvvon nannemiin besset ollu bargit váldit formála oahpu.

Dálkkodeapmi mainna váidudit bákčasiid

Ráđđehus oaivvilda maid, ahte váidudeaddji dálkkodeapmi ja mánáid ja nuoraid fuolaheapmi lea menddo unnán čalmmustuvvon.

– Mii árvalit danin geavahit 2 miljovnna kruvnno gelbbolašvuođaruđain dan ulbmilii. Ulbmil lea nannet eaktodáhtolaš servviid diehtojuohkinbarggu dán joavkku ja sin lagamuččaid ektui, Høie dadjala.

Lasihit fuolahankapasitehta

Ráđđehus árvala lasihit stáhta gaskamearálaš oasi olles jándora fuolahansajiid goluin. Oasi árvalit lasihit dálá 35 proseanttas, gitta 50 prosentii. Dan lassin ráđđehus áigu bajidit rusttetgoluid bajimuš rájá gielddain, mat leat deaddoguovlluin.

– Min árvalus mielddisbuktá gielddaide measta beali eanet ruđa 2014, go maid ovddit ráđđehus lei árvalan, Høie dadjala.

Sosiála bátnedearvvašvuođalokten

2014 bušeahtas ráđđehus árvala lasihit doarjaga daid olbmuid dálkkodeapmái, geain leat stuorra váttisvuođat bátnedearvvašvuođain. Dat veahkeha earret eará ollásit dahje muhtin muddui bánehuvvan olbmuid.

– Dáinna ovdanbuktit mávssolaš vuoruheami. Dáinna árvalusain olbmot, geain leat erenoamáš bátnedearvvašvuođaváttisvuođat, ožžot veahki maid sii dárbbašit, Høie cealká.

Bátnedearvvašvuođa suorggis ráđđehus árvala nannet 40 miljovnnain kruvnnuin bátnedivššu dan lassin, maid ovddit ráđđehus lei árvalan. Ráđđehus árvala maid heaittihit ođđa ortnega, mainna badjel 75-jahkásaččat ožžot nuvttá bátneiskkadeami. Ráđđehus áigu dan sadjái vuoruhit daid joavkkuid bátnedivššu, main leat stuorra bátnedearvvašvuođadárbbut.