Ráđđehus áŋgiruššagoahtá vel eanet bonjuolbmuid ovddas ođđa doaibmaplánain
Preassadieđáhus | Nr: 7/23 | Almmustahtton: 21.02.2023 | Kultur- ja dásseárvodepartemeanta
Odne almmuhuvvui ođđa sohkabeal- ja seksualitehta-máŋggabealatvuođa doaibmaplána. Plána sisttisdoallá 49 doaibmabiju sihkkarastit vuoigatvuođaid, buoridit eallinkvalitehta ja loktet dohkkeheami iešguđetlágan sohkabeliide ja seksualitehtii.
– Berre leat diehttelas ahte buohkat galget beassat leat geat sii leat ja ráhkistit geaid háliidit. Beassat dan rádjai gáibida konkrehta politihkalaš doaimma, ja dan mii galgat ge dál dahkat, dadjá kultur- ja dásseárvoministtar Anette Trettebergstuen.
Ráđđehusa sohkabeal- ja seksualitehtamáŋggabealatvuođa doaibmaplána (2023-2026) galgá veahkkin buoridit bonjuid eallinkvalitehta, sihkkarastit vuoigatvuođaid ja dahkat sohkabeal- ja seksualitehtamáŋggabealatvuođa eanet dohkkehuvvon.
Bonjuin lea heajut eallinkvalitehta ja psyhkalaš dearvvašvuohta go earáin álbmogis, ja tránsaolbmuin lea erenoamáš stuora riska vásihit vealaheami, veahkaválddi, seksuálalaš illastemiid ja psyhkalaš dearvvašvuođaváttuid. Olu bonjuolbmot vásihit ovdagáttuid, vealaheami ja vaššikriminalitehta. Muhtun birrasiin lea erenoamáš váttis leat bonjuolmmoš.
– Bonjuid gižžu beassat leat geat sii leat, lea okta Norgga deháleamos friddjavuođagiččuin. Muhtun birrasiin lea erenoamáš váttis leat rabas ja daid guvlui mii dál njulget ge fuomášumi, dadjá Trettebergstuen.
Doaibmaplánas lhbt+ ovddas leat golbma vuoruhuvvon áŋgiruššansuorggi:
- Bonjuolbmot minoritehtaduogážiin ja bonjuolbmot oskusearvegottiin
- Tránsaolbmot ja olbmot geain lea sohkabealkinkongrueansa
- Fátmmasteaddji valáštallan
Doaibmaplánas leat 49 doaibmabiju maiguin olles ráđđehus lea ovttasbargan. Doaibmabijut leat ráhkaduvvon lagas ovttasbarggus organisašuvnnaiguin dan suorggis earret eará olu cealkámuščoahkkimiid bokte.
– «Homo» adno ain cielossátnin. Olu bonjuolbmot dovdet iežaset olggobealde, dovdet ovdagáttuid ja vaši – skuvlašiljus, bargosajis, ruovttubáikkis ja neahtas. Mis lea bargun buoridit dohkkeheami ja gierdevašvuođa máŋggabealatvuhtii min searvvis, ja dál bargagoahtá ge ráđđehus dainna, muitala kultur- ja dásseárvoministtar.
Doaibmaplánas leat maid doaibmabijut nannen dihte barggu ovddidit bonju olbmuid vuoigatvuođaid riikkaidgaskasaččat.