Girjjálašvuođa

Fága- ja čáppagirjjálašvuođas galgá leat kvalitehta, viidodat ja girjáivuohta sisdoalu ja šáŋŋera dáfus, ja ahte girjjit leat fidnemis lohkkiide.

Guovddáš váikkuhangaskaoamit girjjálašvuođapolitihkas leat Norgga kulturráđi sisaoastinortnegat, lassiárvodivatluvven bábergirjjiin ja ahte gilvolágamearrádusat eai  guoskka  šiehtadusaide girjesuorggi aktevrraide, main fástahaddeortnet ođđa girjjiide lea guovddážis. Dasa lassin addo stáhtalaš doarjja iešguđet gaskkustandoaimmaide ja stipeanddaide girječálliide.

Norgga kulturráđđi hálddaša sisaoastinortnega. Stáhta oastá dihto meari ođđa girjjiid ja skeŋke daid álbmot- ja skuvlagirjerájuide. Girjjit leat lassin daid girjjiide maid girjerájut ieža ostet. Sisaoastinortnegiin lea stuora mearkkašupmi  go ođđa lohkkiide galgá juohkit girjjiid, muhto duddjo maiddái dáiddapolitihkalaš váikkuhangaskaoapmin.

Bargagoahtán ođđa girjelágain

Hurdal-dulbosis ráđđehus čállá, ahte áigot ovddidit girjelága, mii sihkkarastá fástahaddevuogádaga. Girjemárkanis lea dáhpáhuvvan ollu ovddit láhkaárvalusas, mii ovddiduvvui 2013, earret eará geavahit dađistaga eanet girjjálašvuođas rávdnjema bokte ja jietnagirjin.

Lea dárbu ođasmahttit diehtovuođu ovdalgo ođđa láhkaárvalus sáddejuvvo gulaskuddamii. Ferte maid geahččat olles girjjálašvuođapolitihka gaskaoapmeapparáhta ollislašvuohtan. Ráđđehus álggaha čielggadanbarggu ja dasa gullevaš láhkaproseassa, vai beassá evttohit ođđa girjelága Stuorradiggái. Čielggadusas galget árvvoštallat mii gullá girjeláhkii, ja masa dárbbašuvvo eará dan lassin go mii lágas nannejuvvo.

Departemeanta dáhttu girjesuorggi iešguđet oasálaččaid searvat čoahkkimiidda ja buktit čálalaš cealkámušaid čielggadanbarggu oktavuođas.