1. Dáiddalaš friddjavuohta ja cealkinfriddjavuohta vuhtiiváldojuvvo buot riikkain
Artihkal | Maŋimuš ođasmahttojuvvon: 20.01.2026 | Kultur- ja dásseárvodepartemeanta
Norga galgá bargat dan ovdii ahte ovddidit demokráhtalaččat hábmejuvvon kulturpolitihka mearkkašumi buot riikkain, Norgga kulturpolitihkalaš prinsihpaiguin vuolggasadjin, ja erenoamážit deattuhit gaskka dollama prinsihpa. Mihtus lea maid das sáhka ahte bargat dainna ahte láhčit buriid diliid Norgga aktevrraide go sii ovttasbarget eará riikkaid aktevrraiguin, dan bokte ahte riikkaidgaskasaš ortnegat áimmahuššet demokráhtalaš kulturpolitihkalaš vuođđoprinsihpaid.
Dáiddalaš cealkinfriddjavuohta lea deattu vuolde olu sajiin máilmmis, ja lea maid leamašan kontroversiála fáddán Norggas maŋemus jagiid. Digitaliseren ja lassánan globaliseren mielddisbuktá ahte dáiddalaš ja kultuvrralaš ovdanbuktimat sáhttet viidánit guhkás eret dain konteavsttain main álggos čájehuvvojedje. Rámmat dasa movt dáidagiin ja kultuvrrain sáhttá bargat, maiddái kulturaktevrraide Norggas, mearriduvvojit arenain maid Norgga eiseválddit eai leat meroštallan. Lea dehálaš ahte Norgga eiseválddit oassálastet aktiivvalaččat dasa ahte váikkuhit rámmaeavttuid dáiddalaš cealkinfriddjavuhtii riikkaidgaskasaččat, vai cealkinfriddjavuohta sihkkarastojuvvo riikkaidgaskasaš servodagas.
Mihttu boahtá leat erenoamáš dehálaš KUD barggus riikkaidgaskasaš organisašuvnnain nu go UNESCOs ja Eurohpáráđis, ja gulahallamis eará riikkaid eiseválddiiguin, ovdamearkka dihte barggus EEO-ruđaaiguin.