Mihttoolaheapmi eaktuda ahte Norgga aktevrrain leat ovttalágan vejolašvuođat oassálastit kultureallimis beroškeahttá riikkarájiin, sihke hábmejeaddji doaimmas ja buvttadeamis, gaskkusteamis ja olahahttivuođas, ja maiddái geahččin. Norgga dáiddárat ja kulturbargit galget sáhttit doaibmat friddja ja oadjebasat beroškeahttá ovdamearkka dihte seksuála sojus, sohkabealidentitehtas, sohkabealovdanbuktimis, čearddalašvuođas, oskkus ja doaibmanávccain. Dásseárvu kultureallimis lea politihkalaš mihttu maiddái Norgga rájiid rastá.

Riikkaidgaskasaš aktivitehta lea veahkkin dasa ahte Norgga kulturfálaldat speadjalastá álbmoga máŋggabealatvuođa, ja buktá gehččiide miehtá riikka kultuvrra olahanmuddui, mii lea relevánta, áigeguovdil ja identitehtahuksejeaddji ovttaskas olbmui. Dáiddáriid ja kulturbargiid ovttasdoaibma riikkarájiid rastá, Norgga leahkin riikkaidgaskasaš dáidda- ja kulturarenain ja dat ahte viežžat riikkaidgaskasaš aktevrraid Norgga arenaide lea dehálaš dasa ahte hábmet máŋggabealat fálaldaga ruovttus ja sihkkarastit ahte kultureallin Norggas ovdána nu bures go vejolaš.

Mihttu eaktuda ahte lea heivehuvvon dasa ahte Norgga dáiddárat ja kulturbargit sáhttet álggahit ovttasbarggu ja searvat fierpmádahkii mii lokte dáiddalaš kvalitehta. Mihttu lea dehálaš go KUD galgá buktit bajit láidehusaid/bargguid ásahusaide ja organisašuvnnaide. Mihttu lea maid dehálaš ortnegiid hábmemii mat leat njuolga jurddašuvvon suorgái, ovdamearkka dihte Kulturdirektoráhta dahje Norgga filbmainstituhta olis, ja dat lea dehálaš ággan dasa ahte Norga oassálastá riikkaidgaskasaš lonohallanprográmmaide, erenoamážit Kreativt Europa. Dat guoská riikkaidgaskasaš ovttasbargui, mátkkiide ja orrumiidda Norgga dáiddáriidda ja kulturbargiide eará riikkain ja diliid láhčimii olgoriikkalaš dáiddáriid ja kulturbargiid doaimmaide Norggas.