– Buohkain Norggas galgá leat dorvvolašvuohta dearvvašvuođa dáfus, ja olbmot geain leat psyhkalaš dearvvašvuođahástalusat dahje gárrenmirkováttisvuođat galget leat sihkkarat ahte ožžot buori dearvvašvuođaveahki dalle go dan dárbbašit. Bargiidbellodatráđđehus joatká psyhkalaš dearvvašvuođa áŋgiruššamiin, dadjá dearvvašvuođa- ja fuolahusministtar Jan Christian Vestre.

Lassi doarjja vuosttašceahkkefálaldagaide

Jagi 2027 stáhtabušeahttaevttohusas evttoha ráđđehus nannet doarjjaortnega máhttovuđot vuosttašceahkkefálaldagaid ásaheapmái ja ovdánahttimii 60 miljon ruvnnuin. Dasa lassin čilgejuvvo 80 miljovnna lasáhus suohkaniidda friddja dienasin psyhkalaš dearvvašvuođain. Ráđđehus lea plánaáigodagas lasihan juolludeami oppalaččat 500 miljon ruvnnuin nannen dihte psyhkalaš dearvvašvuođafálaldaga ássiide suohkaniin.

– Vuosttašceahkkefálaldat suohkaniin lea dehálaš sihkkarastin dihte olbmuide árra ja buori veahki. Mađi árabut mii nagodit veahkehit, dađi buoret dat lea ovttaskas olbmui ja servodahkii. Ovttas jándorfálaldagaid nannemiin duođaleamos buhcciide lea dát jagi 2027 dehálaš vuoruheapmi, dadjá Vestre.

Buoret fálaldagat psyhkalaš dearvvašvuođasuodjalusas ja gárrendilledivššus

Nannen dihte jándorkapasitehta psyhkalaš dearvvašvuođasuodjalusas, earret eará ásahit jándorfálaldaga mánáide ja nuoraide geain leat gárrenmirkováttisvuođat, ja maiddái olbmuide geain leat borranváttut, evttoha ráđđehus juolludit 70 miljon ruvnno.

Mánáide ja nuoraide leat unnán dikšunfálaldagat spesialistadearvvašvuođabálvalusas rávisolbmuid ektui. Danne áigu ráđđehus huksegoahtit dakkár dikšunfálaldaga psyhkalaš dearvvašvuođasuodjalusas mánáide ja nuoraid (MNP), ja evttoha 50 miljon ruvnno dasa 2027:s.

Ráđđehus áigu maid várret 20 miljon ruvnno heivehuvvon hárjehallanfálaldagaide olbmuide geain leat duođalaš psyhkalaš váttut ja gárrenmirkováttisvuođat. Dat lea joavku mii eallá máŋga jagi oanehet go álbmot muđui, ja doaibmabidju lea oassin doaibmaplánas Bedre helsehjelp – flere gode år (Buoret dearvvašvuođaveahkki – eanet buorit jagit).

– Olbmot geat rahčet gárrenmirkkuiguin ja duođalaš psyhkalaš gillámušaiguin nu go borranváttuiguin galget diehtit ahte servodat lea veahkkin ja addá sidjiide buori dearvvašvuođafálaldaga. Danne vuoruha ge ráđđehus lasihit doarjaga daidda pasieanttaide máŋggaid doaibmabijuid bokte boahtte jagi bušeahtas, dadjá Vestre.

Buoret veahkki – eambbosat bargguin

Ráđđehus evttoha 20 miljon ruvnno vai eanet suohkanat sáhttet váldit atnui dearvvašvuođabálvalusaid ja Nav gaskasaš ovttasbargomodeallaid. Ulbmiljoavkun leat olbmot geain leat geahppa gitta moderáhta psyhkalaš gillámušat, ja vejolaččat maiddái deahkke- ja dákteváttut geat dárbbašit sihke heivehuvvon bálvalusaid ja divššu vai sáhttet bargat.

Ráđđehus evttoha nannet juolludeami čuovvolandoaimmaide maid Nav ieš čađaha, logiin miljon ruvnnuin. Dat addá vejolašvuođa lasihit doaibmabiju Individuála bargodoarjja (IPS) geavaheami, vai eanet olbmot psyhkalaš gillámušaiguin ja gárrenmirkohástalusaiguin sáhttet álgit bálkáhuvvon bargui. Loga Bargo- ja searvadahttindepartemeantta sierra preassadieđáhusa.

– Ráđđehus bargá dearvašet álbmoga ovdii, vai mii sáhttit jávkadit sosiála erohusaid ja fuolahit dan ahte olbmot ožžot buoret beaivválaš eallima. Danne ferte maiddái servodat doarjut ja veahkehit sin guđet leat gahččame eret bargoeallimis. Mii nannet joavkku sin birra guđet leat gahččame eret, dannego mii dárbbašit ahte buohkat geat sáhttet bargat, barget, dadjá Vestre.

Ođđa Psyhkalaš dearvvašvuođaguovddáš Troandimii

Ráđđehus doarju Psyhkalaš dearvvašvuođaguovddáža ásaheami Troandimii stáhtabušeahttaevttohusas.

Guovddáš galgá veahkkin buoridit psyhkalaš dearvvašvuođaveahki Gaska-Norggas.

Čuovvolit psyhkalaš dearvvašvuođa buoridanplána

Psyhkalaš váttut ja gillámušat leat min stuorimus álbmotdearvvašvuođahástalusat, ja dat čuhcet mearkkašahtti olu dearvvašvuhtii ja eallinkvalitehtii ja dagahit ahte olbmot gártet olggobeallai. Iešsorbmenlogut leat maid beare alladat.

Dainna evttohusain čuovvola ráđđehus lohpádusa psyhkalaš dearvvašvuođa buoridanplána birra. Dat lea logi jagi geatnegasvuohta lasihit jahkásaš juolludeami psyhkalaš dearvvašvuhtii 3 miljárdda ruvnnuin. Ráđđehus buvttii ovdán buoridanplána 2023:s, ja dan čuovvoleapmi lea oassi ráđđehusa vuoruhemiin Norgga plánas.

– Mii leat lohpidan lasihit jahkásaš bušeahta psyhkalaš dearvvašvuhtii ja gárrendillái 3 miljárdda ruvnnuin logi jagi badjel. Mii čuovvolit lohpádusa ja joatkit áŋgiruššamiin boahtte jagi. Beallemuttus dan áigodagas lea mis juo sullii 1,5 miljárdda ruvnnu eambbo psyhkalaš dearvvašvuhtii, dadjá Vestre.