–Servodat galgá doarjut ja veahkehit vuorrasiid. Danne lea ráđđehus ovddidan Vuorrasiidvuoruheami mii ođđasis ja nannoseappot áŋgiruššá orrunviesuid, bargoveagaid ja kvalitehta, gulu ja aktivitehtaid ovddas. Ulbmil lea mobiliseret vuorrasiid návccaid ja bargat oččodit oadjebas boahtteáiggi min vuorrasiidda, lohká dearvvašvuođa- ja fuolahusministtar Jan Christian Vestre.

Ráđđehusa Vuorrasiidvuoruheamis evttoha ráđđehus čuovvovaš juolludemiid:

  • 3 365 miljovnna ruvnno juolludusrámma birrajándor dikšosajiid investerendoarjagii 2026, mii dahká birrasiid 1500 saji.
  • 89 miljovnna ruvnno Viessobáŋkku ođđa doarjagii priváhtaolbmuide geat áigot ođastit dahje heivehit iežaset orrunviesuid vai šaddet vuohkkaseappot vuorasolbmuide.
  • 60 miljovnna ruvnno ođđa aktivitehtadoarjagii eaktodáhtolaš ja ideála aktevrraide movttiidahttin dihte ásahit aktivitehtadoaimmaid vuorasolbmuid váste.
  • 38 miljovnna ruvnno doaibmabijuide mat galget buoridit bargiid háhkama ja doaibmabijuide mat loktejit gelbbolašvuođa gullodivššus

– Mii dárbbašit vuorrasiid. Sii leat resursan, geat sihke sáhttet ja háliidit bargat searvevuhtii buorrin. Mii galgat bargat dan ovdii ahte vuorrasiin leat oadjebas orrunviesut, veahkkeneavvut go dárbbašit ja aktivitehta- ja searvadahttinfálaldagat eallimis, dadjá Vestre.

Bealljeapparáhttadáhkádus

  • Vuorrasat, geat dan dárbbašit, galget oažžut bealljeapparáhta 4 mánu sisa.
  • 28 miljovnna ruvnno gelbbolašvuođaovddideaddji doaibmabijuide gullodivššus.
  • 10 miljovnna ruvnno NTNU:i 2026 rájes lasihit 10 oahpposaji audiográfa bachelorohppui.

Viessodoarjja

Vuorasolbmot geat dárbbašit, galget oažžut ekonomalaš doarjaga heivehit orrunviesuset vai šaddá vuohkkaseabbo vuorasolbmuide. Ovdamearkka dihte sáhttet čohkket visot ovtta dássái, bijahit riššudankabineahta lávgungári sadjái, bijahit rindda ja buoret čuovggaid dahje válddihit eret uksalasaid.

Doarjagiin sáhttá gokčat 25 proseantta goluin, eanemusat 75 000 ruvnno juohke ruovttudoalu nammii, ja dasa lassin sáhttá oažžut buori loana Viessobáŋkku čađa. Lea ge Viessobáŋku mii galgá hálddašit doarjjaortnega.

Aktivitehtadoarjja

Ráđđehus áigu mobiliseret vuorrasiid návccaid ovttasbarggus vuorrasiid eaktodáhtolaš joavkkuiguin ja vuorrasiid iežaset organisašuvnnaiguin. Vuorrásat sáhttet ja háliidit searvat, ja go bovde sin ovttasbargui, de áigu ráđđehus bargat oččodit eambbo aktivitehtaid, buoret fálaldagaid ja aktiivvalaš vuorasnuvvama.

Doarjjaortnet heive eaktodáhtolaš ja ideála aktevrraide mat fállet aktivitehtaid vuorrasiidda. Ortnet galgá maiddái fátmmastit fálaldagaid mat veahkehit oapmahaččaid ja leat mielde geahpideame sin noađi.

Investerendoarjja

Investerendoarjja galgá movttiidahttit suohkaniid ođasmahttit ja viiddidit sadjefálaldaga buhcciidruovttuin ja dikšoásodagain olbmuide geat dárbbašit dearvvašvuođa- ja dikšobálvalusaid birrajándora.

2026:s láhčá ráđđehus vejolašvuođa juolludit investerendoarjaga birrasiid 1500 saji várás. Ráđđehus áigu maiddái álkidahttit njuolggadusaid vai suohkanat sáhttet hukset buorebut, jođáneappot ja hálbbibut.