Energiministeren tar imot rapport fra Kjernekraftutvalget

Lávdegotti jođiheaddji Kristin Halvorsen ja energiijaministtar Terje Aasland, geat oassálasttiiga preassakonferánssas. Govven: Energiijadepartemeanta

– Atomafápmolávdegoddi lea bargan vuđolaš barggu, ja dát raportta addá buori vuođu ságastallat atomafámu birra, mii lea vuođđuduvvon máhttui ja fáktádieđuide. Bargiidbellodaga ráđđehussii lea mávssolaš ahte mii oažžut oadjebas ja buori proseassa, mas lea viiddis ja vuđolaš digaštallan, ja mii sáddet dál raportta almmolaš gulaskuddamii, dadjá energiijaministtar Terje Aasland.

Atomafápmu guorahallui maŋemus almmolaš lávdegottis 1978. Atomafápmogažaldat lea fas áigeguovdilin šaddan go lea čuožžilan dárbu nuoskidangeahpeduvvon ja dássedis energiijagálduide, mat sáhttet dustet luonddu- ja dálkkádatroasu ja dustet dađistaga lassáneaddji fápmodárbbu, teknologalaš ovdáneami, ja go priváhta aktevrrat searválaga suohkaniiguin plánejit ásahit atomafápmobuvttadeami.

Geassemánu 2024 nammaduvvui  Atomafápmolávdegoddi, masa Kristin Halvorsen nammaduvvui jođiheaddjin. Lávdegotti bargun šattai čuvgehit máŋga guovddáš temá, earret eará lea go atomafápmu heivvolaš Norgga fápmovuogádahkii, mii lea dutkama ja teknologiijaovdáneami stáhtus, makkár gollohaddi lea ja eará dehálaš váikkuhusat eiseválddiide ja priváhtaaktevrraide, areála- ja birasváikkuhusat, luoitinváttisvuohta, atomasihkarvuohta, sihkkarastin ja ii-viidáneapmi, gearggusvuohta ja gelbbolašvuođadárbu.

– Go lei dárbu oažžut ođasmahtton diehtovuođu atomafámu birra, de lei dehálaš nammadit Atomafápmolávdegotti. Dál lea lávdegoddi buktán viiddis ja vuđolaš raportta. Illudan čiekŋudišgoahtit iežan lávdegotti ávžžuhusaide ja gulaskuddancealkámušaide mat bohtet, dadjá Aasland.

Dás sáhtát lohkat Atomafápmolávdegotti raportta: NOU 2026: 4 – Kjernekraft i Norge? Fordeler, ulemper og forutsetninger (Sámegillii jorgaluvvon: NAČ 2026: 4 – Atomafápmorusttet Norgii? Ovdamunit, hehttehusat ja eavttut)

Máŋgga sajis Norggas leat plánat ásahit atomafápmorusttega. Leat boahtán oktiibuot 10 dieđáhusa mat árvaledje čielggadanprográmmaid vuođđudit atomafápmorusttegiid Norgii, maiddái rusttega Svalbárdii. Guovvamánus 2026 mearridii Energiijadepartemeanta, Dearvvašvuođa- ja fuolahusdepartemeanta ja Dálkkádat- ja birasdepartemeanta daidda plánaide guorahallanprográmma atomafápmorusttega ásaheapmái Taftøy Næringsparkii Aure ja Heim suohkaniidda.

Ráđđehus lea dadjan ahte áigot vuordit Atomafápmolávdegotti árvvoštallamiid ovdal go mearridit gieđahallat daid eará dieđáhusaid.

Dál sáddejuvvo Atomafápmolávdegotti raporta gulaskuddamii, mas gulaskuddanáigemearri lea golggotmánu 8.beaivái. Dasto árvvoštallá ráđđehus viidáset proseassa hárrái. Ráđđehus fátmmasta Stuoradikki heivvolaš vuogi mielde.