– Olbmot galget dovdat oadjebasvuođa dearvvašvuođa ektui ja diehtit ahte sii ožžot dearvvašvuođaveahki mas lea alla kvalitehta, go sii dan dárbbašit. Čálgostáhta galgá leat buoremus dearvvašvuođadáhkádus mii mis lea Norggas. Danne áigut ain nannet buohcceviesuid, dadjá dearvvašvuođa- ja fuolahusministtar Jan Christian Vestre.

– Buohcceviesut leat juo ollašuhttimin ođđa vuordináigemihtuid, mii mearkkaša ahte buot buohccit áiggi vuollái galget leat oažžumin divššu 60 beaivvi siste čujuhusa rájes, jus buohcci ieš ii háliit vuordit dahje dasa leat medisiinnalaš sivat. Oassin oččodeamis vuordináiggiid vuoliduvvot evttoha ráđđehus nationála incentiivaortnega bálkkašan dihtii buori vuordináigebarggu, dadjá Vestre.

Evttohuvvo lasihit doaibmajuolludusaid 3,1 miljárdda ruvnnuin jagi 2027. Dasa lassin biddjo 0,55 proseantasaš resursabuoridanmihttu ja 0,5 miljárdda ruvdnosaš seastindoaibmabidju. Eanaš oassi das maid buohcceviesut beavttálmahttet, besset sii geavahit vuordináiggiid vuolideapmái. Dán jagi lasiheapmi gokčá lassigoluid dan geažil go min lohku stuorru ja mii boarásmuvvat, meroštallon su. 2,6 miljárdda ruvdnun. Seammás ferte maiddái guovddášhálddahus beavttálmahttot ja dasa lea biddjon gáibádussan viežžat sullii 200 miljon ruvnnu.

Dan nationála incentiivaortnegis mii evttohuvvo buohcceviessorámmii, várrejuvvo sullii 720 miljon ruvnnu, ja máksámušat sorjájit duohta bohtosiin. Dat bálkkaša buohcceviesuid mat lasihit doaimma, ja ovttas áŋgiruššanvuđot ruhtadeami máksomearrelassáneami 30 proseanttas 40 prosentii doarju bušeahtta Vuordináigebarggu ja lea mielde vuolideamen vuordináiggiid olles álbmogii.

Ráđđehusas galgá leat dakkár dearvvašvuođaođastus mii addá jotkkolaš bálvalusa ovttaskas buohccái. Bušeahtas evttohuvvo joatkit ruđaid rekrutteren- ja ovttasdoaibmandoarjagii, oktan doarjagiin geahččaladdamiidda mat leat mielde ráđđehusa “Prosjekt X” nammasaš prošeavttas, sullii 350 miljon ruvnnuin jagi 2027. Ruđat galget geavahuvvot dakkár innovatiiva ja gudneáŋgiris ovttasdoaibmandoaibmabijuid geahččaladdamiidda mat galget dutkat ođđa vugiid organiseret dearvvašvuođabálvalusaid.

Ráđđehus joatká maiddái sullii 565 miljon ruvdnosaš sierra doarjagiid Davvi Dearvvašvuhtii jagi 2027:

  • Rekrutteret ja bisuhit bargiid: 220 miljon ruvnnu
  • Rekrutteren- ja ovttasdoaibmandoarjagat: 100 miljon ruvnnu
  • Doarjagat heahtedoaimmaid bisuheapmái
  • Spesialistadearvvašvuođabálvalusa bisuheapmái Álttás: 45 miljon ruvnnu
  • Gearggusvuohta ja heahtebálvalusat Girkonjárggas: 40 miljon ruvnnu