Stáhtabušeahtta 2025
Min oktasaš kulturárbbi jođánet digitaliseren addá 35 ođđa bargosaji Måefies ja Tynsetas
Preassadieđáhus | Nr: 48/24 | Almmustahtton: 07.10.2024 | Maŋimuš ođasmahttojuvvon: 14.10.2024 | Kultur- ja dásseárvodepartemeanta
– Min oktasaš kulturárbi muitala geat mii leat leamaš ja geat mii leat. Dat lea hui guovddážis min oktasaš muittus ja min identitehtas. Kulturárbi galgá leat buohkaid olámuttos Norggas, beroškeahttá gos orrot. Danne áigu ráđđehus várret 40 miljovnna ruvnno nannet kulturárbbi digitaliserenbarggu, cealká kultur- ja dásseárvoministtar Lubna Jaffery.
Ráđđehus evttoha lasihit juolludeami Nationálagirjerádjosii ja Arkiivadoaimmahahkii 20 miljovnna ruvnnuin goabbáige jahkái 2025. Ruđat galget geavahuvvot ásahit sullii 20 ođđa bargosaji Måefies ja gitta 15 ođđa bargosaji Tynsetas. Nationálagirjerájus Måefies ja Norgga dearvvašvuođaarkiiva Tynsetas (Arkiivadoaimmahat) leat huksen ceavzilis gelbbolašvuođabirrasiid Norgga kulturárbbi digitaliseremii.
– Dáinna áŋgiruššamiin divrras kulturárbi digitaliserejuvvo ja lágiduvvo olámuddui jođáneappot. Digitaliseren lea vealtameahttun vai kulturárbemateriála ii láhppo maŋit áiggis, muhto vai seailluhuvvo ja lágiduvvo olámuddui olbmuide miehtá riikka. Áŋgiruššan lea maid mielde sihkkarastime stáhtalaš bargosajiid boaittobeal-Norggas. Dát lea buorre ođas báikkálaš birrasiidda Tynsetas ja Måefies, dadjá Jaffery.