– Ođđa buohcciviesuid investeremiiguin leat Norgga dearvvašvuođabálvalusat máilmmi buoremusaid searvvis maiddái boahtteáiggis. Mii láhčit dili dasa ahte buohcciviesuin leat vistit main lea doarvái kapasitehta buoridit pasieantadikšuma kvalitehta boahtteáiggis, ja earenoamážit mat leat buorit bargosajit bargiide, dadjá dearvvašvuođa- ja fuolahusministtar Jan Christian Vestre. 

Ođđa huksenprošeavttaid birra:

Sunnaas buohcciviesu 3. huksenceahkki

Ráđđehus evttoha 551 miljovnna ruvdnosaš ollislaš loatnarámma Sunnaas buohcciviesu goalmmát huksenceahkkái. Das šaddá ođđa visti mii galgá boahtit guovtti vistti sadjái, mat eai govčča ođđaáigásaš buohcciviesuid gáibádusaid. Prošeakta plánejuvvo gárvánit 2029:s.

Suonjar- ja somatihkkavisti Østfold buohccivissui

Ráđđehus evttoha 3 987 miljovnna ruvdnosaš ollislaš loatnarámma seaŋgasajiid ja poliklinihkkalanjaid somatihkalaš kapasitehta viiddideapmái Østfold buohcciviesus. Ođđa vistái ásahuvvo maiddái suonjarterapiijadikšu, mii Østfold buohcciviesus ii leat dál. Prošeakta galgá gárvánit 2031:s.  

Somatihkkavisti Akershus universitehtabuohccivissui

Ráđđehus evttoha 1 591 miljovnna ruvdnosaš ollislaš loatnarámma Akershus universitehtabuohcciviesu fálaldaga viiddideapmái Norbyhagenis Lørenskog suohkanis, dusten dihte somatihkalaš seaŋgakapasitehta ja govvadiagnostihka kapasitehtahástalusaid. Prošeakta plánejuvvo gárvánit 2030:s. Viiddiduvvon seaŋgakapasitehta galget dađistaga váldit atnui 2040 rádjái, stuorát kapasitehtadárbbu mielde.

Ođđa buohcciviessu psyhkalaš dearvvašvuođasuodjalusa ja spesialiserejuvvon gárrendilledivššu várás Davvi-Norgga Universitehtabuohcciviesu Åsgårdii

Ráđđehus evttoha 2 119 miljovnna ruvdnosaš ollislaš loatnarámma ođđahuksemii ja dálá areálaid ođasteapmái psyhkalaš dearvvašvuođasuddjema, sihkarvuođapsykiatriija ja spesialiserejuvvon gárrenmirkodivššu várás Åsgårdas, Davvi-Norgga universitehtabuohcciviesus. Ođđa visti galgá sihkkarastit buriid ja ođđaáigásaš rámmaid dikšui, buoridit dearvvašvuođabálvalusaid kvalitehta ja váikkuhit buoret pasieantasihkkarvuhtii. Prošeakta galgá gokčat dárbbu psyhkalaš dearvvašvuođasuddjema jándorkapasitehta nannemii ja earenoamážit nannet jándorkapasitehta sihkarvuođapsykiátralaš fálaldagain. Prošeakta plánejuvvo gárvánit 2030:s. 

Ođđa Mjøsbuohcciviessu Innlandet buohccivissui

Ráđđehus evttoha 18 009 miljovnna ruvdnosaš ollislaš loatnarámma ođđa Mjøsbuohccivissui Innlandet buohccivissui. Prošektii gullá čohkket spesialiserejuvvon doaimmaid somatihkas, psyhkalaš dearvvašvuođasuddjemis ja fágaidrasttideaddji spesialiserejuvvon gárrenmirkodivššus Mjøsbuohccivissui mii galgá biddjot Moelvii, ásahit áibmoambulánsaguovddáža Elverumii, elektiiva ortopediija ja veajuiduhttima, akuhtta sismedisiinna, riegádahttinviesu ja njuoratmánáossodaga Elverum buohccivissui, ja nannet Tynset buohcciviesu fálaldaga. Prošeakta plánejuvvo gárvánit 2032:s.