Stáhtaministara sárdni gonagas Harald V:a hávdádeamis

Majestehtat, Gonagaslaš allavuođat, Dronnet Sonja, gudnijahttojuvvon guossit

Maŋemus ođđajagisártnis muitalii Gonagas Harald mátkki birra Aremarkii – movt soai Dronnet Sonjain ruoktotmátkkis leigga geahččan ja moddján goabbat guoibmáseaskka – ja giitevašvuođa birra maid soai dávjá dovddaiga dain oallut mátkkiin miehtá Norgga.

Loahpageahčen ođđabeaisártni árvalii Gonagas ahte mii juohke beaivvi sáhtáleimmet alddiineamet jearrat:

«Man ovddas lean mun giitevaš?»

Maŋemus beivviid lea Norga vástidan – liđiiguin, mánáid tevnnegiiguin, gintaliiguin ja muittuid juogademiin.

Mii leat obba váimmus giitevaččat:

Dan 35 jagi ovddas go Gonagas Harald lei Norgga gonagassan.

Ja buot eanemus dan vuogi ovddas movt son lei gonagassan. 

Son lei allavuođastis olmmošlaš.

Go mii illudeimmet, de illudii son minguin – buriin ja leaikás movttain.

Ja – nu go suoidnemánu 22. b. oktavuođas – go moraš min dettii, de moraštii son minguin.

 

«Giitu Ipmil, luottain sáttogáttis, meara bárustemiin»  lávlluimet mii dás Duopmogirkus.

Gonagas Harald liikui leat meara nalde – ustibiiguin  luonddus ja friddjavuođas.                             

Norgga rittus – Gonagasskiippain – ja váriid badjel ja legiid čađa, gávpogiidda ja giliide mátkkošteigga Gonagas Harald ja Dronnet Sonja.

Son bođii gonagassan – ja go vulggii de ieš oahppan olu dain olbmuin geaid lei deaivan.

Dan riikka man Gonagas vásihii iežas mátkkiin, áicat mii fas su sártniin:

Son dagai Norgga viidábun. Son humai «mii» vuolggasajis, ahte Norggas mii veahkehit guhtet guimmiideamet, juohkehaš dovdá servodatovddasvástádusa, ja buohkat leat ovttaárvosaččat – Gonagas Salomo rájes Jørgen Hattemaker rádjái.

 

Ieš son anii Vuođđolága hui alla árvvus.

Juohke bearjadaga jođihii Gonagas Harald stáhtaráđi Šloahtas – ja devddii dán geatnegasvuođa gitta maŋemussii – son jođihii stáhtaráđi ain borgemánu 7. beaivve.

Munnje stáhtaministtarin, ja sidjiide mu ovdalis, lei Gonagas erenoamáš ságastallanguoibmi.

Dán allaáigásis ságastallamis deaivvaimet mii Gonagasa – muhto maiddái liekkus olbmo, áhči ja ádjá. Mii sáhtiimet ságastallat politihka birra – muhto maiddái  eallima birra.

 

Odne mannet min jurdagat Gonagas Haralda buot lagamusaide – gonagasbearrašii.

Mii oinniimet buolvvaid gaskasaš lagasvuođa. Mii oaidnit min ođđa gonagasa ja dronnega ráhkisvuođa goabbat guoibmáseaskka.

Dii lehpet juogadan din ráhkis áhči, vuohpa ja ádjá olles álbmogiin.

Gonagasa doaimmas lei Dronnet Sonja su fárus ja bálddas – ja su geahčemeahttun áŋgiruššan kultuvrra, luonddu – ja mátkkošteami oktavuođas doalvvui sudno báikkiide  «gos olmmoš ii jáhkáše oktage sáhttá orrut».

Munnje lea báhcán okta govva sadjosii muitui:

Stortinden čohkas Vågan gielddas lea Dronningvarden, Dronnega urra. Dasa leat Dronnet Sonja iežas sánit čullojuvvon:

«Vuoi makkár riikka!»

Ja mun ges dajan: Vuoi makkár dronnet!

 

Gonagas Harald dagai buot Norgga ovddas.

Mii leat dál čoahkkanan moraštit ja gudnijahttit.

Okta áigi lea nohkan. Ođđa áigi álgá.

Norgga monarkiija guoddá min historjjá viidáseappot ja dan nanu vuođđun lea Vuođđoláhka ja álbmotstivra.

Norgga álbmoga ovddas cealkkán mun:

Giitu buot ovddas.

Ja gonagassii Haakon VIII:

Ellos Gonagas!