Dán vahkku ráhppojuvvojedje Svalbárdda máilmmiviidosaš siepmanvuorkká uvssat maŋemus geardde dán jahkái. Dan deponeremii vurkii Ukraina 773 siepmančohkkehusa, earret eará iešguđetge lágan beaivvášrásiin, gortniin, rievdneguoittain ja fuođđaršattuin. Dát lea vuosttaš maid dat riika sádde siepmanvuorkái 2012 rájes.

Ukraina lea stuora eanandoallonašuvdna ja gohčoduvvo dávjá «Eurohpá láibegoren». Dat maid hálddaša erenoamáš viiddis ja dehálaš genabáŋkočohkkehusa mas FAO dieđuid mielde leat eambbo go 150 000 siepmančohkkehusa. Maŋŋel go Ruošša fallehii Ukraina 2022:s, gárttai dat našuvnnalaš genabáŋku Kharkivas heahtedillái go bomben billistii viesuid ja infrastruktuvrra. Ovttas FAO:in ja Crop Trustain, ja Novo Nordisk Foundation ekonomalaš doarjagiin, oassálasttii NordGen hoahppobargui seamma jagi giđđat doarjun dihte dan ukrainalaš genabáŋkku. Maŋŋelaš sirdojuvvui čohkkehus juogasadjái oarjjás Ukrainas, guhkkin eret soahtešiljus.

– Dalle go Norga ásahii Svalbárdda máilmmiviidosaš siepmanvuorkká, de lei jurdda sihkkaris vugiin vurkkodit máilmmi biebmošattuid máŋggabealatvuođa, ja maid olbmuide oktasaš resurssa. Dálá deponeret čájeha ahte dán višuvdna lea eambbo áigeguovdil go goassege ovdal. Riikkat ja ásahusat barget ain ovttas suodjalit genehtalaš resurssaid mat boahttevaš buolvvat dárbbašit biebmosihkarvuođa ja vuosttaldanfámu dáfus. Mii leat rámis go dainna go ovttasbargat Crop Trustain ja NordGenain dán áidnalunddot máilmmiviidosaš ovttasbarggus, dadjá eanandoallo- ja biebmoministtar Nils Kristen Sandtrøen.

Ukraina lassin, de sáddejedje 20 eará genabáŋkku njealji máilmmioasis oktiibuot eanet go 16 000 čohkkehusa siepmanvuorkái. Kássain ledje siepmančohkkehusat mat bohte Ásias, Lulli-Amerihkás, Eurohpás ja Afrihkás.

Svalbárdda máilmmiviidosaš siepmanvuorká doaibmá sihkkaris vuorkán mas máilmmi genabáŋkkut sáhttet nuvttá vurkkodit iežaset erenoamáš siepmančohkkehusaid liige siepmaniid. Dát čohkkehusat leat mearrideaddjit boahtteáiggi máilmmiviidosaš biebmosihkarvuhtii. Dál vurkkoduvvojit eanet go 1,4 miljovnna siepmančohkkehusa mat bohtet badjel 130 genabáŋkkus. Dat dahká Svalbárdda máilmmiviidosaš siepmanvuorkká máilmmi stuorimus rádjun sihkkarastit gilvojuvvon biebmošattuid šláddjivuođa.