Ole Henrik Magga vuoitá davviriikkalaš sámi giellabálkkašumi – Gollegiella
Preassadieđáhus | Almmustahtton: 18.01.2023 | Gielda- ja guovlodepartemeanta
Davviriikkalaš sámi giellabálkkašupmi – Gollegiella 2022 geigejuvvo professor emeritus Ole Henrik Maggai Stockholmmas odne. Son lea olles iežas eallinagis erenoamáš buriin vugiin áŋgiruššan sámegielaid ovddidemiin, ovdánahttimiin ja gáhttemiin. Iežas eallingeardedagu bokte lea son čájehan sámiide ja máilbmái muđui ahte sámegiella lea dehálaš ja ealli giella.
– Stuorra iluin ja gudnevuollegašvuođain sávan lihku Ole Henrik Maggai davviriikkalaš sámi giellabálkkašumiin Gollegiella. Ole Henrik Magga bargu ovddidemiin ja ovdánahttimiin sámegielaid ja su bargu sámi gielladutkamiin lea áidnalunddot. Barggus bokte lea son dahkan vejolažžan sihke boares ja ođđa sámi giellageavaheddjiide geavahit sámegielaid sihke čálalaččat ja njálmmálaččat. Dasa lassin lea son bázzin sámepolitihkas, riikkaidgaskasaš álgoálbmotpolitihkas ja barggus álgoálbmotvuoigatvuođaiguin, dadjá gielda- ja guovloministtar Sigbjørn Gjelsvik (Gb).
Ruoŧŧa lea dán jagi ovddasvástideaddji riika Gollegiella-giellabálkkašumi geigemis, mii geigejuvvo logát gearddi. Bálkkašeapmi geigejuvvo ministariid ja sámediggepresideanttaid čoahkkima olis, Stockholmmas, ođđajagimánu 18. beaivvi 2023.
Ole Henrik Magga lea riegádan 1947, Guovdageainnus, Davvi-Norggas. Iežas bargguid bokte lea son jahkelogiid bargan gielaid ovdáneami ovddas, earet iežá akademalaš oahpu ja dutkama olis, ja maiddái oahpponeavvuid ovddideami ja oahpaheami bokte. Magga lea ráhkadan dálá davvisámegiela čállinvuogi, čállán lullisámi grammatihka ovttas Lajla Mattsson Maggain ja searvan sihke ubmi- ja bihtánsámegielaid čállinvugiid ovdánahttinbargguide. Magga lea maiddái leamaš oassálaš eamiálbmotásahusaid ceggemis, sihke riikkadásis ja riikkaidgaskasaš dásis, ovdamearkka dihte ON bistevaš eamiálbmotforuma vuosttas presideantan, ja Norgga beale sámedikki ásaheamis, mas Ole Henrik Magga lei vuosttas presideanta.
Gollegiella bálkkašupmi ásahuvvui movttiidan dihte sámegielaid ovdánahttima ja ealáskahttima. Bálkkašupmi geigejuvvo juohke nuppát jagi.