Doaktárat/buohccindieđiheaddjit: Gažaldagat ja vástádusat buohcanvihpančuovvoleami rievdaduvvon njuolggadusaid birra
Almmustahtton: 04.07.2011 | Inkluderende arbeidsliv (IA)
Maid mearkkašit bargobiraslága ja álbmotoadjolága evttohuvvon rievdadusat buohccindieđihuvvon bálkábargi čuovvoleapmái? Dás gávnnat vástádusaid 21 gažaldahkii Prop. 89 L sisdollui mat gusket farggabut čuovvoleapmái ja njuolggadusaid rihkkumiidda jos bálkábargi buohccá.
Doaktárat/buohccindieđiheaddjit:
1. Goas galggan oasálastit gulahallančoahkkimiin?
Vástádus: Don leat geatnegahttojuvvon oassálastit gulahallančoahkkimiin jos leat ožžon bovdejumi. Vuolggasadjin lea ahte don nugo buohccindieđiheaddjin galggat oasálastit gulahallančoahkkimiin maid bargoaddi lágida maŋimuš čieža vahku maŋŋil go bálkábargi lea buohccindieđihuvvon, earret jos bálkábargi ii hálit ahte don galggat searvat. Gulahallančoahkkimiin maid NAV lágida galggat don nugo buohccindieđiheaddjin oasálastit jos etáhta árvvoštallá dan ávkkálažžan.
2. Maid sáhtán mun váikkuhit buohcanvihpanbarggus?
Lea dehálaš ahte don árvvoštalat geavahit muddejuvvon buohcandieđáhusa. Don galggat oažžut bargoaddis čuovvolanplána njeallje vahku siste. Dán plána galggat geavahit vuođđun árvvoštallat buohcandieđihuvvon olbmuid vejolašvuođaid ollásit dahje belohahkii bargat. Gulahallančoahkkimiin sáhtát fuolahit ahte ságastallat vuđolaččat bargonávccaid árvvoštallama birra.
3. Mii dáhpáhuvvá jos in oasálastte gulahallančoahkkimiin?
Jos NAV registrere ahte don leat vihpan logi gulahallančoahkkimis masa leat bovdejuvvon 24-mánuáigodagas, de oažžut dieđihanreive etáhtas. Jos dus eai leat dohkálaš vihpanákkat čieža čoahkkimii, de sáhtát oažžut ráŋggáštusdivada sullii 10.000 kruvnno.
Vuolggasadjin lea ahte don leat geatnegahttojuvvon oasálastit bovdejuvvon gulahallančoahkkimiin. Árvvoštallamis ahte galgá go ráŋggáštuvvot, váldojuvvojit almmatge vuhtii erenoamáš sivat mat dahket váttisin oasálastit. Stuora bargonoađđi ii dohkkejuvvo ággan dasa ahte ii boahtit gulahallančoahkkimiidda.
Jos don leat ožžon guokte divada máksit váilevaš oasálastima geažil 24-mánu áigodagas, de sáhtát massit rievtti čálihit buohcandieđáhusaid mat addet vuoigatvuođa oažžut álbmotoadjoruđa ovtta jahkái.