Bargosisafárren Davviriikkain ja EES:s   

Norga oassálastá iešguđet ovttasbargguide main lea mearkkašupmi bargosisafárren- ja bargomárkanpolitihkkii. Earret eará lea mis oktasaš davviriikalaš bargomárkan, ovtta Ruoŧain, Dánmárkkuin, Suomain ja Islánddain. Buot davviriikalaš riikkavuložat sáhttet friija mátkkoštit Davviriikkain barggu geažil. EES-šiehtadusa bokte gullá Norga oktasaš eurohpalaš bargomárkanii mii sihkkarastá friija bargofápmojohtolaga EES-riikkaid gaskkas. EES-riikkavuložat sáhttet boahtit Norgii bargat, eai ge dárbbaš ohcan orodanlobi.

Bargo- ja čálgoetáhta ovttasbarget eará eurohpalaš bargomárkaneiseválddiiguin

EURES (the European Network of Employment Services) bokte. EURES lea eurohpalaš fierpmádat bargogaskkustanbálvalusaid várás mii ovddida mobilitehta dainna lágiin ahte láhčá diliid dasa ahte bargoaddit sáhttet háhkat bargofámu EES:s ja ahte bargoohccit sáhttet gávdnat barggu eará EES-riikkain. Rabas virggiid ja ávkkálaš dieđuid EES-guovllu bargomárkana birra sáhttá gávdnat EURES-portálas.

Bargosisafárren riikkain EES olggobealde   

Norgga fitnodagat sáhttet maiddái háhkat bargofámu riikkain mat leat EES olggobealde (olggobealriikkat). Olggobealriikkaid bargosisafárrejeaddjit fertejit ohcat orodanlobi olgoriikkalaččaidlága njuolggadusaid vuođul. Orodanlohpi bargosisafárrejeddjiide juolluduvvo sin gelbbolašvuođa vuođul ja sin bargodilálašvuođa vuođul Norggas. Eanaš bargosisafárrejeaddjit olggobealriikkain leat fágaoahppan bargit dahje áigodatbargit. Dasa lassin sáhttet iehčanas ealáhusdoaimmaheaddjit ja bálvalusfállit oažžut orodanlobi. Orodanlohpeohcamiid meannuda Olgoriikalaččaiddirektoráhta (UDI).