Ruhtaspealut Norggas
Artihkal | Maŋimuš ođasmahttojuvvon: 19.11.2026 | Kultur- ja dásseárvodepartemeanta
Bajit dási ulbmil ruhtaspeallomárkana muddemis Norggas lea eastadit speallanváttisvuođaid ja eará heajos váikkuhusaid ruhtaspealuin, ja maiddái sihkkarástit ahte ruhtaspealut čađahuvvojit vásttolaš ja oadjebas vuogi mielde. Dasa lassin galgá mudden láhčit dili nu ahte ruhtaspealuid badjebáza manná ulbmiliidda mat eai leat vuođđuduvvon dietnasiidda. Norgga ruhtaspeallanpolitihka ulbmilat eai leat dásseárvosaččat. Ovddasvástideaddjivuohta lea ruhtaspeallopolitihka stuorimus ulbmil.
Norgga ruhtaspeallanpolitihka ja dálá oktovuoigatvuođamodealla vuođđun leat dábálaččat golbma váldoeavttu maid vuhtiiváldit:
- ahte eastada heajos speallandábiid,
- ahte eastada ekonomalaš rihkolašvuođaid, ja
- ahte ráddje priváhta dietnasa.
Stuorimus ruhtaspealut Norggas fállojuvvojit oktovuoigatvuođamodealla mielde. Norsk Tippingas lea oktovuoigatvuohta fállat ruhtaspealuid, ja Stiftelsen Norsk Rikstoto ges fállá ruhtaspealuid heastagilvvohallamiin. Kultur- ja dásseárvodepartemeanttas lea ovddasvástádus Norsk Tipping AS eaiggátstivremis. Departemeanttas lea maiddái vuoigatvuohta nammadit eanetlogu miellahtuid Stiftelsen Norsk Rikstoto stivrii. Modealla galgá sihkkarastit ruhtaspeallomárkanii buori almmolaš dárkkisteami ja stivrema.
Dasa lassin sáhttet organisašuvnnaide, mat eai leat vuođđuduvvon dietnasiidda, addot lohpi lágidit priváhta ruhtaspealuid ráddjejuvvon sturrodagas, ovdamearkka dihte bingo bingohállas dahje servodatviesus. Dat ruhtaspealut galget leat oktovuoigatvuođafálliid ruhtaspeallofálaldagaide lassin, eai ge gilvalit daiguin. Unnimus ruhtaspealut sáhttet čađahuvvot almma lobiid haga, muhto ovdamearkka dihte ii sáhte daid gávpejohtu leat eanet go 200 000 ruvnno juohke kaleandarjagi. Dat guoská ovdamearkka dihte gáhkkolotteriijaide ja basáraide.