Geaidda guoská ortnet?   

Ulbmiljoavkun leat olbmot gaskal 18 ja 55 jagi geat leat

  • ožžon dorvvu ja nu báhtareaddjistáhtusa
  • sirdinbáhtareaddjit
  • leat ožžon orodeami humanitára sivaid geažil dorvoohcama vuođul
  • fas ovttastahtton daid joavkkuid bearrašiidda mat leat namuhuvvon bajábealde geat leat olbmot geat maŋŋá earráneami leat ožžon orodanlobi iešheanalaččat illasteami geažil ovttaseallimis  

Gelbbolašvuođakárten ja karriearabagadus   

Oahpistanprográmma ulbmiljoavkku oassálastiin lea vuoigatvuohta ja geatnegasvuohta čađahit gelbbolašvuođakártema ja karriearabagadusa. Dat galgá leat veahkkin heivehit oahpistanprográmma juohkehačča dárbui. Gielda galgá fuolahit gelbbolašvuođakártema, ja fylkkagielda galgá fuolahit karriearabagadusa.

Gielddaid ovddasvástádus   

Gielda lea geatnegahtton fuolahit oahpistanprográmma aiddobáliid boahtán sisafárrejeddjiide dan ulbmiljoavkkus geat ásset gielddas. Seammás addá oahpistanláhka gielddaid rievttálaš rámma integrerenbargui. Vuoigatvuohta oassálastit oahpistanprográmmii gusto dušše vuosttaš ássangildii.

Prográmma sisdoallu   

Oahpistanprográmma lea oktagaslaččat heivehuvvon gealbudeapmái ollesáiggis, ja ulbmilin lea nannet sisafárrejeddjiid vejolašvuođaid oassálastit bargo- ja servodateallimii, ja nannet sin ekonomalaš iešheanalašvuođa. Oahpistanprográmmii gullá uhcimusat

  1. dárogieloahpahus
  2. servodatmáhttooahpahus
  3. eallimis birgema kursa
  4. bargui dahje ohppui guoski oassi

Oassálastit geain leat vuollil 18 jahkásaš mánná galget oassálastit váhnenbagadussii. Seammá guoská oassálastiide geat ožžot máná prográmmaáiggis.

Ođđajagimánu 2026 rájes biddjo uhcimusgáibádussan bargui guoski oassi sin várás geain lea bargui guoski prográmma.

Prográmma loahppamihttu ja bistu   

Gielda galgá bidjat loahppamihttu juohkehačča prográmmii. Oahppoduogáš lea láidesteaddjin go biddjo loahppamihttu ja bistu prográmmii. Prográmma viiddiduvvo ođđajagimánu 1. b. 2026 rájes sin várás geain galgá leat formálalaš oahppu prográmmas.

Integrerenplána ja integrerenšiehtadus  

Gielda galgá ovttasráđiid oassálastiin hábmet integrerenplána ja integrerenšiehtadusa (gč. integrerenlága §§ 15 ja 16). Ođđajagimánu 1. b. 2026 rájes galgá guhkesáigásaš mihttu oassálastái boahtit ovdan integrerenplánas ii ge integrerenšiehtadusas.

Oassálastin vuolggaha vuoigatvuođa oahpistandoarjaga   

Oassálastin prográmmii addá vuoigatvuođa oahpistandoarjagii. Doarjaga sturrodat lea guovtte geardde álbmotoaju jahkedássásaš vuođđosupmi. Vuollet 25 jahkásaš oassálastit geat eai oro ovttas váhnemiiguin, ožžot 2/3 doarjaga. Vuollet 25 jahkásaš oassálastit geat orrot ovttas ovtta váhnemiin dahje goappašat váhnemiiguin, ožžot 1/3 doarjaga. Doarjja lea vearrogeatnegas. 

Oahpistanprográmma sin várás geain lea oktasaš suodjalus   

Integrerenlága gaskaboddasaš heiveheamit sin várás geain lea oktasaš suodjalus mii guoská oahpistanprográmmii, fámohuhttojit ođđajagimánu 1. b. 2026 rájes. Ain ii galgga servodatmáhttooahpahus leat geatnegahtton sisdoallu dán joavkku prográmmas.

Olbmot gaskal 18 ja 55 jagi geain lea oktasaš suodjalus ožžot ođđajagimánu 1. b. rájes sihke vuoigatvuođa ja geatnegasvuođa oassálastit oahpistanprográmmii.

Prográmmas galgá uhcimusat leat bargui ja ohppui guoski oassi, dárogieloahpahus ja oanehis eallimis birgema kursa.

Olbmuid várás geain lea vuollel 18 jahkásaš mánná, galgá maiddái váhnenbagadus gullat oahpistanprográmmii. Dat guoská maiddái sidjiide geat ožžot máná prográmmaáiggis.