– Finnmárkogessosa lassáneapmi lea ráđđehusa davviguovlostrategiija čuovvoleapmi. Ássan ja ealáhusdoaimmat davvin leat dehálaččat gáhtten dihte min iešráđđejumi, ja dalle ferte leat geasuheaddjin fárret ja bissut áŋgiruššanguovllus, cealká ruhtadanministtar Stoltenberg (Bb).

Finnmárkogessosa lassáneapmi boahtte jagi bušeahtas boahtá lassin nuvttá mánáidgárddiid álggaheapmái, oahppoloana sihkkunortnegiid nannemii, liige mánáidodjui ja dasa ahte suodjalus nannejuvvo sakka davviguovlluin. Áŋgiruššanguovllus ii leat bargoaddidivatge.

Olbmuide guoski váikkuhangaskaoamit

Ráđđehus árvala lasihit Finnmárkogessosa 30 000 ruvnnos 45 000 ruvdnui jagi 2026 stáhtabušeahtas.  Dát vearrogeahpádus meroštallojuvvo dahkat 175 miljovnna ruvnno 2026:s. Olbmuide guoski váikkuhangaskaomiid árvu áŋgiruššanguovllus šaddá dasto badjel guokte miljárdda ruvnno. Dasa lassin leat visot fitnodagat áŋgiruššanguovllus luvvejuvvon bargoaddidivadis, ovdamunni mii dahká sullii vihtta miljárdda ruvnno 2026:s. 

Davvi-Romssa ja Finnmárkku áŋgiruššanguvlui gullet buot Finnmárkku suohkanat ja Romssa fylkka čieža davimus suohkana, main leat oktiibuot 92 500 ássi.

Olbmuide guoski váikkuhangaskaoamit áŋgiruššanguovllus leat:

  • Olbmuid dábálaš sisaboađu vearromáksomearit leat 18,5 proseantta, dan sadjái go 22 proseantta nu go muđui riikkas.
  • Finnmárkogeasus (45 000 ruvnno ráđđehusa evttohusain).
  • Áŋgiruššanguovllus ii leat elrávnnjis lassiarvodivat ii ge eldivat
  • Nuvttá mánáidgárdi.
  • Liige mánáidoadju golggotmánu 1. beaivvi 2025 rájes (6 000 ruvnno jahkái).
  • Oahppoloatnavealggi sihkkun (jahkái 2026 evttohuvvo gitta 60 000 ruvnno jahkásaččat).

Ná ollu sáhttá bearaš seastit

Bearaš mas lea obbalaš dienas 1,2 miljon ruvnno, guokte máná mánáidgárddis ja oahppoloatna, sáhttá jahkásaččat seastit gitta 200 000 ruvnno jus orrot áŋgiruššanguovllus, go buohtastahttá dainna ahte orrut ovdamearkka dihte Oslos.

Ráđđehussii lea deaŧalaš ahte dát nana váikkuhangaskaoamit bohtet oidnosii buohkaide geat árvvoštallet ásaiduvvat áŋgiruššanguvlui, ja sidjiide geat juo ásset doppe.  

– Mii diehtit ahte leat iešguđet vuhtiiváldimat go árvvoštallá gosa áigu ásaiduvvat, muhto ekonomiija lea álohii dehálaš oassi obbalašvuođas, dadjá ruhtadanministtar.

Fáktádieđut Finnmárkogessosa birra:

  • Dábálaš sisaboađu geasus mii álggahuvvui 1990:s.
  • Vearromáksit geat leat registrerejuvvon álbmotregistarii ovtta áŋgiruššanguovllu suohkanis, sáhttet bargat olggobealde áŋgiruššanguovllu ja liikká gáibidit gessosa.
  • Ráđđehus lea ovdal lasihan Finnmárkogessosa 15 500 ruvnnos 2021:s 30 000 ruvdnui 2025:s.
  • Jagi 2026-bušeahta árvalusain lea geasus measta golmmageardánaston viđa jagis.