– Mari Boines lea guhkes ja máŋggabealat musihkkakarrieara. Son lea máŋgalogi jagi leamaš dehálaš jietna ja ovdagovva earenoamážit sámi álbmogii ja álgoálbmogiidda obbalaččat. Iluin mii dál beassat gudnebálkádeami bokte loktet ovdan ovtta min stuorámus dáiddáriin, dadjá kultur- ja dásseárvoministtar Lubna Jaffrey (Bb).

Stáhta gudnebálká addo dušše ovtta dáiddárii hávális. Ortnet ásahuvvui 1963:s ja lea 200 000 ruvnna jagis. Dat lea vearuhis ruhta ja bistá olles eallima.

Čálli Johan Falkberget lei vuosttaš olmmoš gii oaččui gudnebálkká 1963 rájes 1967 rádjái. Dasto oaččui neavttár Per Aabel áigodagas 1973–1999, neavttár Wenche Foss 2002–2011 ja čálli Dag Solstad 2011–2025.