Nationálabibliotehka
Olggut doaibma | vuollásaš etáhta | Kultur- ja dásseárvodepartemeanta
Nationálabibliotehka bargu lea čohkket, registreret, vurket ja láhčit almmuhuvvon materiálaid olámuddui buot almmuhansajiin. Dainna lágiin lea Nationálabibliotehka mávssolaš gáldu dieđuide mat leat Norgga birra ja Norgga dilálašvuođaid birra. Nationálabibliotehka doaibma lea Sollis Oslos ja Måefies/Muoffis.
Nationálabibliotehka servodatdoaibma lea viiddiduvvon daid maŋemus jagiid. Guoktelogi jagi leat sii digitaliseren iežaset čoakkáldagaid, muhto 2020:s ožžo sii dasa lassin bargun digitaliseret Norgga kulturárbbi Norgga arkiivvain, bibliotehkain ja museain. Sin doaibmaváldi viiddiduvvui vel eambbo 2025:s, go Nationálabibliotehka oaččui bargun hárjehit, ođasmahttit ja olámuddui dahkat dárogielat ja sámegielat giellamodeallaid, maid Norgga servodat galgá sáhttit geavahit.
Nationálabibliotehka stáhtus lea leat dutkanásahussan, ja lea Norgga dutkamii mávssolaš infrastruktuvrra resursa. Ásahusas lea maid ovddasvástádus koordineret girječálliidávvudemiid, nugo boahttevaš Ibsena ávvudeapmi lea 2028:s.
Nationálabibliotehka lea stáhta bibliotehkasuorggi ovdánahttinorgána, ja lea veahkkin ovdánahttime ja nanneme riikka álbmot- ja fágagirjerádjosiid. Ásahus hálddaša ja juolluda prošeakta- ja ovdánahttinruđaid álbmotgirjerádjosiidda, ja áimmahuššá nationála infrastruktuvrra, nugo ovdamearkka dihte nationála luoikkahankoartta, girjerájusohcama ja girjerádjosiid oktasaš almmuhančovdosiid.
Nationálabibliotehkas lea ovddasvástádus Tibi bálvalussii - Biblioteket for tilrettelagt litteratur (Girjerájus heivehuvvon girjjálašvuođain). Tibi bokte lea ásahus veahkkin dasa ahte olbmot, geain doaibmavádjitvuođa geažil lea váttisvuohta lohkat deaddiluvvon teavstta, ožžot vejolašvuođa seamma dieđuide, girjjálašvuhtii ja girjerájusbálvalusaide nugo muđui álbmot dahká. Nationálabibliotehka doaimmaha maiddái Det flerspråklige bibliotek dahje sámegillii Máŋggagielat girjerájus, mii lea girjerádjosiid doarjjabálvalus. Máŋggagielat girjerádjosa vehkiin sáhttet girjerádjosat iežaset geavaheddjiide fállat girjjiid ollu iešguđetlágan gielaide.
Nationálabibliotehka lea veahkkin čađaheame stáhtalaš girjerájuspolitihka ja leat čuovvolahttime našuvnnalaš doaibmabijuid mat gustojit lohkanhállui.
Geassemánus 2026 ásahii Nationálabibliotehka ođđa fágaráđi, mii galgá doaimmahit girjerájusbargguid: Nationálabibliotehka ođđa fágaráđđi - Girjerájusovdánahttin
Neahttasiidu: https://www.nb.no/