Ulbmil doarjagiin lea hábmejuvvon bajit dásis. Lea NIF mii hábme konkrehtalaš ulbmiliid ja vuoruhemiid das movt spealloruđat galget adnot dan njealji doarjjapoasta siskkobealde. Ulbmilat ja vuoruheamit galget speadjalastit miellahtuid ja miellahttoorganisašuvnnaid dárbbuid.

Doarjja galgá:

  • Leat veahkkin doalahit ja ovddidit dan ahte NIF lea eaktodáhtolaš, ja lea miellahttovuđot organisašuvdna.
  • Leat veahkkin bisuheame ja sihkkarastime ahte NIF lea rabas ja fátmmasteaddji organisašuvdna, ja ahte falástallansearvvit leat báikkit gos ásahuvvojit áktanis ja sosiála searvevuođat.

Stáhta vuoruhuvvon ulbmiljoavkkut oažžut NIF doarjaga leat mánát ja nuorat (6-19 jahkásaččat) ja doaibmavádjit olbmot. Mánáid-, nuoraid, ja álbmotfalástallama doaibmabijut galget sisttisdoallat doaimmaid sihke sidjiide geat háliidit gilvvohallat ja sidjiide geat háliidit hárjehallan- ja lihkadanfálaldagaid. NIF:as lea earenoamáš ovddasvástádus láhčit dili vai buohkat besset searvat, beroškeahttá das makkár sohkabealli, ahki, čearddalašvuohta, osku, seksuála sodju, doaibmannákca ja/dahje makkár kultuvrralaš, sosiála ja ekonomalaš duogáš ja orrunsadji guđes ge leažžá.

Stáhta njunušfalástallandoarjja vuođuštuvvo njunušfalástallama rolla ektui ahte lea kultuvrralaš identitehtahábmejeaddji, ja ahte álbmot obbalaččat ollu berošta njunušfalástallamis.