Sámi boazodoalloguovllus galgá láhka láhčit dili ekologalaččat, ekonomalaččat ja kultuvrralaččat guoddevaš boazodollui, mii bidjá sámi kultuvrra, árbevieruid ja dábiid vuođđun, ávkin boazodoalloálbmogii alccesis ja servodahkii muđui. Jus dáid ulbmiliid galgá olahit, de ferte sáhttit organiseret ja hálddašit boazodoalu ulbmillaččat lága vuođul. Boazodoallu galgá seailluhuvvot sámi kultuvrra ja servodateallima dehálaš vuođđun.

Láhka galgá veahkehit sihkkarastit boazodoalloareálaid sámi boazodoalloguovllus, boazodoalu deháleamos resursavuođđun. Lea sihke boazodoallovuoigatvuođalaččaid, eará vuoigatvuođalaččaid ja eiseválddiid ovddasvástádus sihkkarastit areálaid.

Sámi boazodoalloguovllu olggobealde galgá láhka láhčit diliid dasa ahte boazoguohtunresurssat geavahuvvojit ekologalaččat ja ekonomalaččat guoddevaš vugiin, báikkálaš kultuvrra ja árbevieruid vuođul, dain guovlluin gosa lea addon lohpi doaimmahit boazodoalu § 8 njuolggadusaid mielde.

Sihke siskkobealde ja olggobealde sámi boazodoalloguovllu galgá láhka leat mielde sihkkarastime bohccuide dohkálaš elliidčálggu.