Mihttu 2: Sihkkarastit bonjuolbmuid rivttiid

Oassemihtut:

• Vuostálastit vašširihkolašvuođa bonjuolbmuid vuostá
• Fátmmasteaddji bargoeallin bonjuolbmuide
• Gieldit konverterenterapiija
• Dohkkehit olbmuid iežaset vásáhusa sohkabealleidentitehtas

Doaibmabidju 12: Ovddidit láhkaevttohusa konverterenterapiija gieldimii

Ráđđehus ovddida 2023 giđa láhkaevttohusa konverterenterapiija gieldima birra.

Doaibmabidju 13: Nannet bolesiid easttadandoaimmaid oahpahusa ja bagadusa bokte

Nationála gelbbolašvuođabiras vašširihkolašvuođas galgá leat mielde bajideamen bolesguovlluid máhtolašvuođa ja gelbbolašvuođa vašširihkolašvuođas. Gelbbolašvuođabiras čađaha oahpahusa bolesguovlluide nannen dihtii bolesiid nationála vašširihkolašvuođa eastadan- ja hehttenbarggu, mii sisdoallá maiddái vašširihkolašvuođa bonjuolbmuid vuostá.

Doaibmabidju 14: Viidásit ovdánahttit váidojuvvon vašširihkolašvuođa statistihka ja analysaid

Bolesdirektoráhtta lea guhkit áiggi ráhkadan jahkásaš analysa vašširihkolašvuođas ja nu čuvvon man ollu leat váidagat ja áššit, mat meannuduvvojit rievttis. Nationála statistihka galgá ovddidit viidáset addin dihte eanet máhtolašvuođa das mo iešguđet joavkkuide čuohcá vašširihkolašvuohta, mas vealaheapmi seksuála soju, sohkabealleidentitehta ja sohkabealledovddaheami geažil lea oassin.

Doaibmabidju 15: Ásahit bolesiid ja bonjuolbmuid gulahallama ja deaivvadanbáikkiid

Bolesat galget addit álbmogii buoret vejolašvuođaid beassat muitalit makkár vuordámušat sis leat bolesiidda. Bolesat galget sihke nationála ja báikkálaš dásis álggahit gulahallama ja ásahit heivvolaš deaivvadanbáikkiid iešguđet álbmotjoavkkuiguin. Dat lea dehálaš sihke sihkkarastin dihtii guovttebealat dieđuidlonuheami ja oktavuođaid ja luohttevašvuođa huksemii.

Doaibmabidju 16: Váldit mielde sohkabealledovddaheami vealahanvuođđun dásseárvo- ja vealahanláhkii

Ráđđehus áigu ovddidit evttohusa, man mielde fátmmastit “sohkabealledovddaheami” sierra vealahanvuođđun dásseárvo- ja vealahanláhkii ja vejolaččat eará lágaide.

Doaibmabidju 17: Čielggadit goalmmát juridihkalaš sohkabeallekategoriija ásaheami

Mánáid-, nuoraid- ja bearašdirektoráhtta (Bufdir) lea ožžon bargun čielggadit goalmmát juridihkalaš sohkabeallekategoriija. Čielggadeapmi galgá geigejuvvot ráđđehussii 2023 mielde.

Doaibmabidju 18: Bajidit NAV bargiid gelbbolašvuođa

Bargo- ja čálgoetáhtta galgá láhčit diliid dasa, ahte váldet mielde máhtolašvuođa sohkabealle- ja seksualitehtamáŋggabealatvuođas iežaset gelbbolašvuođabarggus, nannen dihte etáhta cuokka váikkuhit buori ja fátmmasteaddji bargoeallimii. Bargo- ja čálgoetáhtta galgá hábmet obbalaš njuolggadusaid dasa, ahte bargogaskkusteami oktavuođas ii dáhpáhuva vealaheapmi. Dasa fátmmastit mielde máŋga geavaheaddjijoavkku, maiddái bonjuolbmuid.

Doaibmabidju 19: Buoridit bonjuolbmuid bargobiras- ja bargodearvvašvuođastatistihka

Ráđđehus áigu buoridit bonjuolbmuid bargobiras- ja bargodearvvašvuođastatistihka dan bokte ahte árvalit sohkabealleidentitehta Bargoeallima eallindilleguorahallama variábelin. Boahtte eallindilleguorahallama gažaldagaid ođasmahttet 2024:s.