Mihttu 3: Oččodit stuorát dohkkeheami sohkabealle- ja seksualitehtamáŋggabealatvuhtii
Oassemihtut:
- Sihkkarastit vuogádatlaš ja guhkesáiggi gelbbolašvuođaovddideami sohkabealle- ja seksualitehtamáŋggabealatvuođas eallinagiperspektiivvas
- Láhčit máhtu bonjuolbmuid vásihusain almmolaš sektora olámuddui
- Čalmmustahttit bonjuolbmuid dáidaga, kultuvrra ja historjjá olles álbmogii
- Ovddidit álbmogii eanet positiiva guottuid bonjuolbmuid ektui
Doaibmabidju 20: Ovddidit DjO-doaimmaid, maiguin buoridit máhttovuođu
Doaibmabijuin ovddidit áigeguovdilis, dutkanvuđot máhttovuođu sohkabealle- ja seksualitehtamáŋggabealatvuođas sektoreiseválddiide ja bálvalussurggiid áŋgiruššamii dásseárvvu beales ja vealaheami vuostá. Dutkan, man fáddán leat bonjuolbmot geain lea minoritehtaduogáš, bonjuolbmot oskkuservošiin, transolbmot, olbmot geain sohkabealli ii kongruere identitehtain ja buohkaid fátmmasteaddji valáštallan galgá vuoruhuvvot.
Doaibmabidju 21: Čohkket máhtolašvuođa vuorrasit bonjuolbmuin
Go Norga jođihii Davviriikkaid dásseárvoministariid ráđi, mii bargá dásseárvvu ja LGBTI ovddas 2022:s, de álggahuvvui prošeakta man olis čohkkejit máhtu vuorrasit bonjuolbmuid eallinkvalitehtas ja eallindilis Davviriikkain. Prošeakta čađahuvvo Nordisk information för kunskap om kön (NIKK, Davviriikkalaš diehtojuohkin sohkabeali birra) bokte ja galgá loahpahuvvot konferánssain skábmamánu 2023.
Doaibmabidju 22: Ovdánahttit indikáhtoriid maiguin mihtidit ovdáneami
Indikáhtorat maiguin mihtidit bonjuolbmuid dili ovdáneami Norggas galget ovdánahttot.
Doaibmabidju 23: Nannet seksualitehtaoahpahusa mii fátmmasta lhbt+
Ráđđehus áigu joatkit barggu, man olis dorjot seksualitehtaoahpahusa skuvllas. Ráđđehusa vuođđodoarjaga ožžot jagi 2023 FRI, Rosa kompetanse skole, Rosa kompetanse barnehage, Skeiv ungdom, Sex og Politikk ja Blikk.
Doaibmabidju 24: Sihkkarastit vuogádatlaš ja guhkesáiggi máhttoovddideami suodjalussektoris
Ráđđehus galgá bargat dan ala ahte bajidit sohkabealle- ja seksualitehtamáŋggabealatvuođa máhtolašvuođa suodjalussektoris. Okta vuohki sáhttá leat lasihit sohkabealle- ja seksualitehtamáŋggabealatvuođa Suodjalusa skuvllaid oahppoplánaide, ja ásahit e-oahpahusa sohkabealle- ja seksualitehtamáŋggabealatvuođa birra suodjalussuorggis.
Doaibmabidju 25: Guorahallat medisiinnalaš divššu praksisa mánáid ektui, geain lea riegádeami rájes eahpesihkkaris gorutlaš sohkabealleovdáneapmi
Eahpesihkkaris gorutlaš sohkabealleovdánahttimii riegádeami rájes (dárogillii medfødt usikker kroppslig kjønnsutvikling, DSD) gullet máŋga hárvenaš dili, mat čatnasit eahpečielga sohkabealleovdáneapmái. Ráđđehus áigu geahčadit otná praksisa mo guorahallet ja dikšot mánáid, geain lea riegádeami rájes eahpesihkkaris somáhtalaš sohkabealleovdáneapmi, ja árvvoštallat dárbbašuvvogo nationála fágalaš normeren. Árvvoštallojuvvo maiddái dárbbašago nannet praksisa fágalaš rámma ja lea go dárbu lágain nannet vel eanet go mii dálá njuolggadusvuođus lea.