Politihkalaš vuođđu nationála unnitloguid ektui
Artihkal | Maŋimuš ođasmahttojuvvon: 20.02.2020 | Gielda- ja guovlodepartemeanta
Olmmošjoavkkut main guhká lea leamaš čatnaseapmi Norgii meroštallojuvvojit nationála unnitlohkun. Norggas dakkár olmmoščearddat leat juvddálaččat, kvenat/norggasuopmelaččat, romálbmot (sigøynarat), romániálbmot/táhterat ja meahccesuopmelaččat.
Norgga politihkka nationála unniálbmogiid ektui lea historjjálaččat deattuhan dáruiduhttima ovttabeallásaš heiveheami stuoraservodahkii. Unnitloguid giella ja kultuvra badjelgehččojuvvui ja galggai jávkaduvvot. Nuppi máilmmisoađi maŋŋá rievdagođii eiseválddiid politihkka unniloguid ektui, ja dál lea dohkkehuvvon ahte Norga lea árvvusadnojuvvon máŋggakultuvrralaš ja máŋggabealat servodat.
Norga lea dohkkehan Eurohpáráđi rámmakonvenšuvnna nationála unnitloguid suodjaleami birra, ja dan vuođul lea Gielda- ja guovlodepartemeantta ovddasvástádus ovttastahttit stáhta politihka nationála unnitloguid guovdu Norggas. Departemeanta háliida lagas gulahallama organisašuvnnaiguin mat ovddastit nationála unnitloguid sihkkarastin dihtii ahte sin oainnut vuhtiiváldojuvvojit. Mii galgat maid fuolahit ahte guovddášhálddašeamis lea lagas oktavuohta dáid joavkkuiguin.
Loga eanet dáppe:
- Eurohpáráđi rámmakonvenšuvnna nationála unnitloguid suodjaleami birra (jorgaluvvon dárogillii)
Eaŋgalasgielat teaksta - St.prp.nr. 80 (1997-98) Válddi mieđihit dohkkehit Eurohpáráđi rámmakonvenšuvnna nationála unnitloguid suodjaleami birra, guovvamánu 1.b.1995
- Stuoradiggedieđáhus nr. 15 (2000-2001) Nationála unnitlogut Norggas – stáhta politihkka juvddálaččaid, kvenaid, romálbmoga, romániálbmoga ja meahccesuopmelaččaid ektui
- Árvl.S.nr. 145 (2000-2001) Árvalus Norgga nationála unnitloguid gielddalašlávdegottis - Stáhta politihkka juvddálaččaid, kvenaid, romálbmoga, romániálbmoga ja meahccesuopmelaččaid ektui