Gielddain lea ovddasvástádus álbmotgirjerájuin ja skuvlagirjerájuin, ja fylkkagielddain lea ovddasvástádus fylkkagielddaid girjerádjobargguin mat gusket bagadallamii, ovttastahttimii ja ovdánahttindoaimmaide, gč. álbmotgirjerádjolága.

Máhttodepartemeanttas lea ovddasvástádus fuolahit universitehtaid ja allaskuvllaid fága- ja dutkangirjerájuid.

Kultur- ja dásseárvodepartemeanttas lea bajimuš našunála girjerádjoovddasvástádus vuosttažettiin ruhtaáššiin maid Stuoradiggi juolluda stáhtabušeahta kapihtal 326 bokte Našunálgirjerádjui ja Norgga jietna- ja čuokkesčálagirjerádjui. Juovlamánu 20.b. 1985 láhka álbmotgirjerájuid birra addá bajit ulbmiliid álbmotgirjerájuide ja juohká ovddasvástádusa hálddašandásiid gaskkas.

Našunálgirjerádju

Našunálgirjeráju doaibma lea vuođđuduvvon addingeatnegasvuođalágas. Ulbmil lágain lea sihkkarastit ahte dokumeanttat main leat dábálaš dieđut addojit Našunálgirjerádjui, vai vihtanuššan norgga kultuvrra ja servodateallima birra vurkejuvvo ja nu sáhttá geavahuvvot gáldun dutkamis ja dokumentašuvnnas.

Našunálgirjerádju lea stáhtalaš ovdánahttinorgána girjerádjosuorggis ja galgá veahkehit hábmet ja čađahit našunála girjerádjopolitihka sihke álbmot- ja fágagirjerádjosiin. Našunálgirjerájus lea erenoamáš ovddasvástádus veahkehit ovdánahttit ja nannet Norgga girjerájuid doaibmi ja áigeguovdilis servodatásahussan, ja hálddaša prošeakta- ja ovdánahttinruđaid dien ulbmilii. Našunálgirjerádju lea maid ožžon ovddasvástádusa hálddašit doarjagiid ollu eará girjerádjodoaimmaide, nugo girjerádjofálaldagat giddagasain ja dearvvašvuođaásahusain.

Norgga jietna- ja čuokkesčálagirjerádju (NJČ), buvttada ja luoiká dábálaš girjjiid ja fágagirjjiid čalmmehemiide ja sidjiide geain lea heajos oaidnu.

Našunálgirjeráju ossodat Muoffis

Našunálgirjeráju ossodat Muoffis hálddaša addingeatnegasvuođaortnega ja fuolaha ahte duođaštusat čohkkejuvvojit, registrerejuvvojit, vurkejuvvojit ja ahte dat leat fidnemis. NG Muoffis gullá maid Vuorkágirjerádju, audiovisuála čoakkáldagat ja Našunálgirjeráju digitála bálvalusaid huksen. Dáid surggiin fuolaha NG Muoffi oktavuođa geavaheddjiiguin. 

Našunálgirjeráju ossodat Oslos

Našunálgirjeráju ossodagas Oslos lea váldoovddasvástádus Našunálgirjeráju doaimmas geavaheddjiid ektui. Dasa gullá láhčit dili nu ahte čoakkáldagaid sáhttá geavahit ossodagaid lohkanlanjain ja luoikkahemiin ja gáiddusgeavahemiin elektrovnnalaš neahttavuđot bálvalusaid bokte. Ossodat fállá maid gáiddusluoikkaheami iežas čoakkáldagain, ja gaskkusta materiálaid maid olgoriikkas oažžu luoikkasin norgga girjerájuide. NG Oslo ráhkada norgga našunálbibliografiija ja fállá máŋggalágan bibliográfalaš bálvalusaid ja buktagiid.