Buresdoaibmi demokratiija gáibida ahte ássiin lea čanastat ja sáhttet oassálastit almmolašvuhtii, ja ahte sii besset friddja hábmet iežaset oaiviliid. Dat mearkkaša ahte ássiin lea friddjavuohta ja vejolašvuohta ovdanbuktit oainnuideaset ja háhkat dieđuid, ja ahte preassas lea friddjavuohta ja vejolašvuohta doaimmahit iežaset servodatrolla. Friddja redaktevrastivrejuvvon mediat, mat doaimmahit servodatávkkálaš ja kritihkalaš journalistihka, ja mat speadjalastet geahččanguovlluid ja iešguđetlágan oaiviliid servodagas, leat hui dehálaččat demokratiijai. Dat leat dehálaččat sátnefriddjavuhtii, demokráhtalaš gearggusvuhtii ja vuostálastinnávccaide boasttudieđuid vuostá.

Danne lea stáhta mediapolitihka mihttu láhčit dili rabas ja čuvgejuvvon almmolaš gulahallamii, sihkkarastit sátnefriddjavuođa ja nannet demokráhtalaš gearggusvuođa. Daid mediapolitihkalaš mihtuid olaheamis leat máŋggalágan friddja ja bistevaš redaktevrastivrejuvvon mediat dehálaččat.

Sihke ekonomalaš váikkuhangaskaoamit (dego mediadoarjja) ja regulerendoaibmabijut (dego ovddasvástádusa juogadeapmi ja redakšuvnnalaš sorjjakeahtesvuohta) veahkehit olahit Norgga redakšuvnnalaš mediaid máŋggabealatvuođa ja kvalitehta mihtuid. Buoridan dihte mediaid rámmaid einnostanvuođu, ja doarjun dihte mediaid sorjjakeahtesvuođa, mearriduvvojit eiseválddiid njuolggo mediadoarjaga ja NRK doarjaga ekonomalaš stivrensignálat 4 jagi áigodahkii hávális.

Mihttun lea ahte mediadoarjja galgá leat einnostahtti, eahpebyrokráhtalaš ja dat galgá leat nu guhkkin eret politihkalaš eiseválddiid go vejolaš.

Mediabearráigeahčču hálddaša departemeanttaid doarjjaortnegiid mediasuorggis.

Mediadoarjagis leat čuovvovaš ortnegat:

  • Buvttadandoarjja ođas- ja áigeguovdilmediaide
  • Buvttadandoarjja sámi ođas- ja áigeguovdilmediaide
  • Innovašuvdna- ja ovdánahttindoarjja
  • Doarjja báikkálaš jietna- ja govvamediaide

Lassin departemeantta doarjjaortnegiidda leat aviissat, das maiddái elektrovnnalaš aviissat, main váldooassi leat teavsttat ja govat, luvvejuvvon lassiárvodivadis. Lassiárvodivat gullá Ruhtadandepartemeantta ovddasvástádussuorgái.