Eurohpálaš kulturovttasbargu
Artihkal | Maŋimuš ođasmahttojuvvon: 12.11.2025 | Kultur- ja dásseárvodepartemeanta
EEO-ruđat: kulturlonohallan ja ovttasbargoprográmmat
EEO-ruđat leat Norgga, Islándda ja Liechtensteina doarjja ekonomalaš ja sosiála erohusaid dássemii Eurohpás. Oktiibuot ožžot 15 riikka Guovddáš- ja Lulli-Eurohpás prošeaktadoarjagiid dehálaš servodatsurggiide. EEO-ruhtadoarjagiid váldo mihttomearrin lea buoridit ovttasbarggu ja gulahallama ruhtaaddi- ja vuostáiváldiriikkaid gaskka, ja dat guoská sihke eiseválddiide ja ovttaskas oasálaččaide.
Dán ruhtadanáigodagas lea várrejuvvon 177 miljovnna EURO kulturlonohallanprográmmaide mas leat mielde Bulgária, Latvia, Lietuva, Polska, Portugal, Romania, Slovakia ja Čehkkia. Ulbmilin lea viiddis prošeaktaovttasbargu Norgga ja olgoriikkalaš oasálaččaid gaskka. Kulturdirektoráhtta ovddida ja hálddaša ollu dáid prográmmaid ovttasráđiid olgoriikalaš eiseválddiiguin, ja EEO-ruđaid oktavuođas doaibmá dat Norgga gulahallanguovddážin kulturlonohallansuorggis. EEO-ruhtaortnegis fállojuvvojit maid doarjjavejolašvuođat kulturárbe-/kulturmuitosuorggis, gos Riikkaantikváras lea vástideaddji rolla Norgga bealde.
EU kultur- ja mediaprográmma Hutkás Eurohpá
Hutkás Eurohpá lea eahpitkeahttá buot stuorámus ja deaŧaleamos rámmaprográmma kultuvrralaš ja audiovisuála suorggis masa 40 miellahttoriikka leat searvan. Norga lea searvan EU kultur- ja mediaprográmmaide 1996 rájes, ja searvá maid Hutkás Eurohpá dálá prográmmaáigodahkii 2021-2027.
Prográmma doarju hui viidát smávva ja stuora eurohpálaš ovttasbargoprošeavttaid, fierpmádagaid ja lávddiid mat ožžot lassiárvvu. Dát addá Norgga beale TV-, filbma-, dáidda- ja kulturdoaimmaide ođđa ruhtadanvejolašvuođaid, ođđa vejolašvuođaid ovttasbargat riikkarájiid rastá ja olahit stuorát eurohpálaš publihka.
Hutkás Eurohpás lea oasseprográmma dáidaga ja kultuvrra váste (KULTUR) ja oasseprográmma TV, filmma ja spillaid váste (MEDIA), ja dasa lassin vel sektorrasttideaddji oasseprográmma. Eurohpá oaivegávpogat lea maid Hutkás Eurohpá oassin. Prográmma nanne kultur- ja hutkáivuođasuorggi gilvalanvejolašvuođaid, innovašuvnna ja ceavzilvuođa Eurohpás.
Kulturdirektoráhtta lea Norggas koordinerejeaddji ásahussan mas lea erenoamáš ovddasvástádus juohkit dieđuid ja rávvagiid Norgga beale aktevrraide dáidaga ja kultuvrra oasseprográmma birra. Norgga filbmainstituhtas lea ovddasvástádus juohkit dieđuid ja rávvagiid TV, filmma ja spillaid oasseprográmma birra.
- Hutkás Europa, EO prográmma kultur- ja hutkáivuođasuorggis (Kulturdirektoratet.no)
- Oasseprográmma Hutkás Eurohpá MEDIA (mediadesk.no)
- Prop. 176 S (2020–2021) (Duogáš ja mearrádus searvat Hutkás Eurohpá ortnegii): Samtykke til deltakelse i en beslutning i EØS-komiteen om innlemmelse i EØS-avtalen av forordning om etablering av Kreativt Europa, EUs program for kultursektoren og audiovisuell sektor (2021-2027) og endringer i statsbudsjettet 2021 under Kulturdepartementet (regjeringen.no)
Europeana ja CEF Digital
EO-prográmma Connecting Europe Facility – Digital bokte oassálastá Norga Europeanas, mii lea oktasaš eurohpálaš neahttavuđot, rabas dáidda- ja kulturčájáhus mii doaibmá digitála čohkkensadjin, gos gávdná miljovnnaid mielde girjjiid, njuhttojuvvon govaid, filmmaid, dávviriid ja arkiivamateriála. Dál lea 8,4 proseantta Europeanas čoakkáldaga sisdoalus boahtán Norggas.
Kulturdirektoráhtta lea našuvnnalaš aggregáhtor Europeana Norgga sisdoalus.