Dáiddárekonomiija

Departemeantta bargu nannet dáiddárekonomiija fátmmasta iešguđetlágan dáiddárpolitihkalaš gaskaomiid. Guokte mávssolaš joavkku leat juridihkalaš ja ruđalaš gaskaoamit. Sierralágan divadat, buhtadusortnegat ja stipeandaortnegat leat dáiddáriid ruđalaš rámma oassin. Dasa lassin váikkuhit oppalaš lágat dáiddáriid dillái.

Stáhta dáiddárstipeanddat ja dáiddáriid dáhkiduvvon sisaboađut

Stáhta dáiddárstipeanddat ja dáiddáriid dáhkiduvvon sisaboađut leat mávssoleamos gaskaoamit, maiguin veahkehit dáiddáriid beassat johtui dáiddabargguin ja maiguin movttiidahttet ovddidit dáiddárbarggu. Ortnegat  láhčet dilálašvuođaid máŋggabealat ja ođđabuvttadeaddji dáiddaeallimii Norggas.

Dáiddárstipeanddaide gullet bargostipeanddat, nuorat/aiddo álgán dáiddáriid bargostipeanddat, eará ulbmiliid stipeanddat (diversestipend) ja áiddo oahpu váldán dáiddáriid eará ulbmiliid stipeanddat, guhká bargan dáiddáriid ja seniordáiddáriid stipeanddat, iešguđetlágan unnit stipeanddat dáhkiduvvon boađuid lassin. Statens kunstnerstipend (olggobeale neahttasiidu) hálddaša ortnegiid. 

Stáhta buhtadusat

Stáhta máksá juohke jagi kollektiiva buhtadusa dán riikkas almmustuvvan dáidaga geavaheames dan oktavuođas go dáidaga luiket almmolaš girjerájuide (girjerádjobuhtadus) ja go čájehit almmolaččat norgga ja sámi govvadáidaga, fotogovvadáidaga ja dáiddaduoji (čájáhusbuhtadus). Stáhta šiehtada jahkásaččat TONO:in buhtadusa, maid mákset musihka geavaheames ipmilbálvalusain ja seremoniijain Norgga girkus ja registrerejuvvon oskkuservošiin. Departemeanta lea johttáhan pilohtaprošeavtta, mas mákset čájáhusbálkká dáiddáriidda, geat gullet ásahusaide, maid stáhta doarju, ja stáhta juolluda juohke jagi doarjaga čájáhusstipeanddaid várás gielddaid ja fylkkaid doaimmaide. 

Viiddis gaskaoapmeapparáhtta

Lassin dáidda ortnegiidda juolludit njuolggodoarjaga ovttaskas dáiddáriidda eará ortnegiid bokte, omd. Norsk Kulturråd, Fond for lyd og bilde ja Fond for utøvende kunstnere.  

 

Departemeanta bijai johtui čielggadanbarggu maid Vigdis Moe Skarstein  jođihii, dáiddáriid ruhtadili birra. Raporta Rapporten "Kunstens autonomi og kunstens økonomi" , geigejuvvui kulturministtar Thorhild Widvey:ii jagis 2015. Dáiddárpolitihkalaš gaskaoapmeapparáhtta lea nannejuvvon ja viiddiduvvon. Leat johtuibiddjojuvvon ođđa doaimmat buoridan dihte kultureallima iežas ceavzilvuođa ja buvttademiid vejolašvuođaid márkana ektui. Skuespiller- og danseralliansen lea šaddan bistevaš doaibman, galleriijadoarjja olgoriikkaáŋgiruššamii ja pilohtaprošeakta čájáhushonorára lea ásahuvvon. Olahanvejolašvuohta olgoriikka márkaniidda lea nannejuvvon Norwegian Arts Abroad bokte ja Kreativt Norge ásaheapmi galgá fuolahit doaimmaid mat leat čadnon dáiddáriid iežas sisaboađuide ja nannet dáiddáriid doarjjaapparáhta.