Oahpaheaddjiáŋgiruššan

Ráđđehusa ulbmil “Oahpaheaddjiáŋgiruššamiin – ovttas máhttoskuvlla ovdii” (Lærerløftet - på lag for kunnskapsskolen) lea ovddidit skuvlla, mas oahppit ohppet eanet. Skuvla galgá addit buohkaide buori álggu eallimii, dat galgá leat mielde dássemin sosiála earuid ja sihkkarastit norgga bargomáilmmi ja buorredili.

Bilde av lærer og elever
Govva: Sveinung Ystad

Skuvla galgá addit buohkaide buori álggu eallimii, dat galgá leat mielde dássemin sosiála earuid ja sihkkarastit norgga bargomáilmmi ja buorredili. Dat galgá addit buoremus reaidduid sihke servodahkii ja juohke mánnái, vai birgejit boahtteáiggis. Vaikko skuvllas leat ollu buorit bealit, de leat ain menddo ollu oahppit, geat eai oahpa lohkat, čállit ja rehkenastit albma láhkai. Strategiija “Oahpaheaddjiáŋgiruššan – ovttas máhttoskuvlla ovdii” lea mávssolaš vuohki ovddidit ášši.

Oahpaheaddjistrategiija doaimmat

Máhttu ja oahppu gullet ráđđehusa váldoáŋgiruššansurggiide, ja Oahpaheaddjiáŋgiruššamis leat ollu doaimmat, maiguin buoridit skuvlla:

  • Buot ohppiin galgá leat oahpaheaddji, gii lea čikŋon matematihkkii, eaŋgalsgillii ja dárogillii.
  • 5-jagi masteroahppu oahpaheaddjistudeanttaide
  • Oahpaheaddjioahpuide beassan eaktuda matematihka árvosáni 4 ovddeš 3:ža sajis
  • Oahpaheddjiide eanet joatkkaoahput go goassige ovdal
  • Čađahit geahččalanprošeavtta, mas ovddidit oahpaheddjiide ođđa karrieraluottaid
  • Eanet gelbbolašvuohta fylkkaide, gielddaide ja rektoriidda dan hárrái mo ovddidit máhttoskuvlla
  • Hukset skuvlii nana joavkkuid ja fágalaš oktiigullevašvuođa

Oahpaheaddjit, geat leat čikŋon fágaide

Ráđđehus háliida ovddidit buriid oahpaheddjiid vel buorebun. Dutkama bokte leat vuđolaččat čájehan, ahte oahppit ohppet eanet, go oahpaheddjiin lea nana fágamáhttu. Seammás čájehit Statistihka guovddášdoaimmahaga logut, ahte okta viđa matematihkkaoahpaheaddjis, okta čieža dárogieloahpaheaddjis ja njealjis logi eaŋgalsoahpaheaddjis eai leat čikŋon fágii, maid sii oahpahit vuođđoskuvllas. Ráđđehus háliida, ahte dálá fágalaš čiekŋuma gáibádus, mii guoská aiddo oahpu váldán oahpaheddjiide, guoská buohkaide. Mánáidskuvlla oahpaheddjiin galgá nappo leat unnimusat 30 oahppočuoggá fágas, vai sii besset oahpahit matematihka, eaŋgalsgiela ja dárogiela. Nuoraidskuvllas gáibiduvvo unnimusat 60 oahppočuoggá.

Áŋgiruššet joatkkaoahpu ovdii

Vai buot oahpaheddjiin livččii vejolašvuohta háhkat gelbbolašvuođa, mii dál gáibiduvvo, de Ráđđehus áŋgiruššá ain viidáseappot joatkkaoahpu ovdii. Čavčča 2015 rájes ožžot 5 050 oahpaheaddji joatkkaoahppofálaldaga. Ráđđehus geavaha oktiibuot badjel 1,2 miljárdda kruvnno oahpaheddjiid maŋŋá- ja joatkkaohppui 2015. Dan vuođul gielddat ja eará skuvlaeaiggádat sáhttet plánet ja organiseret oahpaheddjiideaset joatkkaoahpu. Nu skuvlaeaiggádat sáhttet deavdit gelbbolašvuođagáibádusaid, ja sáhttet maid addit oahpaheddjiide, geat jo devdet eavttuid, vejolašvuođa ovddidit gelbbolašvuođaset.

Oahpaheddjiid masteroahppu

Ráđđehus áigu maid ásahit oahpaheddjiid viđa jagi masteroahpu 2017. Dat lokte oahpaheaddjioahpu kvaliteahta ja addá oahpaheaddjistudeanttaide buoret vuođu bargat bargguset.  

Čavgejit matematihka árvosátnegáibádusa

Ráđđehus čavge matematihka oktasašfága árvosátnegáibádusa, nu ahte čavčča 2016 rájes galgá leat ovddeš 3:ža sajis árvosátni 4 studeremii ráhkkanahtti oahppoprográmmas, vai beassá oahpaheaddjiohppui. Sii geat eai deavdde ođđa gáibádusa, sáhttet čađahit matematihka ovdakurssa ja besset dan vuođul oahpaheaddjiohppui. Dasa lassin doalahit njuolggadusa, man mielde joatkkaoahpahusa oahppit, geat leat ceavzán matematihka bajit dásis, maiddái devdet ohppui beassama gáibádusa.

Karriera luohkkálanjas

Ráđđehus háliida doalahit buriid oahpaheddjiid luohkkálanjas. Danin álggahuvvo geahččalanprošeakta, mas geahččalit guokte karrieraluotta muhtun gielddain čakčat 2015. Geahččalanprošeakta bistá guokte jagi ja čađahuvvo sihke vuođđoskuvllas ja joatkkaoahpahusas.

Joavkovuoiŋŋa duddjon skuvllas

Buori skuvlla ovddideapmi, mas oahppit ohppet eanet, lea joavkobargu. Mávssoleamos oassi buori skuvlla ovddidanbarggus dahkkojuvvo ovttaskas skuvllas, gielddas ja fylkkas. Danin Oahpaheaddjiáŋgiruššan ii leat dušše áŋgiruššan oahpaheddjiid ovdii, muhto sisdoallá maid doaimmaid, mat veahkehit skuvlajođiheddjiid ja skuvlaeaiggádiid sin barggus. Ráđđehus juolluda ruđa maŋŋá- ja joatkkaohppui, juolluda ain doarjaga KS skuvlaeaiggátprográmmii, joatká Nuoraidceahki ovddidanstrategiija ja joatká rektoroahpu ođđa áigodaga 2015 – 2020. Ulbmilin leat fágalaččat nana oahpaheaddjit, doaimmalaš skuvlaeaiggádat ja skuvlakultuvra, mas deattastit juogadeami, nu ahte oahppit ohppet eanet.