– Ráđđehus háliida láhčit sámegielaide ja sámi kultuvrii buriid eavttuid, ja joatká fievrridit aktiiva kultur-, ealáhus- ja giellapolitihka 2027:s. Dat lea dehálaš sápmelaččaide, ja vai bisuhit Norgga máŋggabealatvuođa, dadjá gielda- ja guovloministár Bjørnar Skjæran.

Ráđđehus lea bargame čuovvolit máŋga Stuoradikki ávžžuhanmearrádusa duohtavuođa ja seanadeami birra.

– Deháleamos doaimmaid gaskkas lea vuosttaš dieđáhus seanadanpolitihka birra maid ráđđehus galgá ovddidit Stuoradiggái 2027 čavčča. Seanadeapmi lea guhkilmas bargu mii gáibida ahte sii geat vásihedje dáruiduhttima fátmmastuvvojit viidát. Ráđđehus lea danne bargame gávdnat buriid doaibmabijuid mat áiggi mielde sáhttet váikkuhit seanadeapmái, dadjá Skjæran. 

Seammás go ráđđehus bargá seanadanpolitihka dieđáhusain, de áigu ráđđehus 2027 giđa ovddidit jahkásaš dieđáhusa sámi giela, kultuvrra ja servodateallima birra.