Ekspertgruppen samiske barnehagetilbud sammen med statssekretær Sindre Lysø og sametingsråd Ann-Elise Finbog
Ekspertgruppen samiske barnehagetilbud sammen med statssekretær Sindre Lysø og sametingsråd Ann-Elise Finbog Govva: Kunnskapsdepartementet
Viečča gova

Ráđđehusas leat čielga áigumušat sámepolitihkain. Ráđđehus áigu nannosit áŋgiruššat sámegielaiguin, váikkuhit dasa ahte oahpahuvvojit eanet sámegielat oahpaheaddjit ja mánáidgárdeoahpaheaddjit ja lasihit sámi mánáidgárdesajiid. Áššedovdijoavkku bargu galgá leat mielde láhčimin vuođu buoret dásseárvosaš ja olahahtti mánáidgárdefálaldahkii sámi mánáide, ja sihkkarastit ahte eanebuin lea vejolašvuohta bajásšaddat nu ahte sámi giella ja kultuvra lea lunddolaš oassin árgabeaivvis.

– Sámi mánáidgárddit leat áibbas mearrideaddjin sámegielaid nannemii. Danne lean ilus go mii dál, ovttas Sámedikkiin, leat ásahan nana áššedovdijoavkku, dadjá máhttoministtar Kari Nessa Nordtun.

Duorastaga cuoŋománu 9. b. doalai áššedovdijoavku vuosttaš čoahkkima, ja stáhtačálli Sindre Lysø ja Sámediggeráđđi Ann-Elise Finbog oassálasttiiga.

– Munnje lea stuorra illun leat dás go mii odne čalmmustahttit dán barggu álgima mii mearkkaša ollu sámi mánáide, sámegielaide ja min boahtteáigái. Midjiide dat mearkkaša juoidá mii lea vuđolaš: ahte sámi mánáin galgá leat mánáidgárdefálaldat mii lea vuođđuduvvon sin gillii, kultuvrii ja árvvuide – ja ahte bargiin lea dat gelbbolašvuohta mii dárbbašuvvo dasa ahte addit mánáide aiddo fal dan, dadjá sámediggeráđđi Ann-Elise Finbog.

Dárbu sámi mánáidgárddiide lea lassáneamen

Duogážin evttohussii nammadit áššedovdijoavkku lea go miehtá riikka ohcaluvvojit eanet ja eanet sámi mánáidgárdefálaldagat. Seammás eai leat fálaldagat lassánan dárbbu mielde. Stuorámus hástalus lea go váilot sámegielat bargit, mii gáržžida vejolašvuođa nannet sihke giela ja identitehta mánáidgárddiin.

Áššedovdijoavku galgá rávvet Máhttodepartemeantta das mo fálaldaga sáhtášii buoridit sihke siskkabealde ja olggobealde sámegielaid hálddašanguovllu. Barggu dehálaš oassi lea háhkat ođasmahtton máhttovuođu dálá dilis ja čujuhit guđiide doaibmabijuid berre čađahit oanehat ja guhkit áiggi vuollái.

Áššedovdijoavkku lahtuin lea máŋggabealat duogáš suorggis, mánáidgárdeoahpaheaddjeoahpuin, organisašuvnnain, mánáidgárdeeaiggádiin, giellasuorggis ja eará akademiijain.

Jođiheaddji, Torjer Olsen, illuda bargagoahtit ja joavkkus lea viides gulahallan surggiin.

–Min barggus lea sáhka das mii lea buot deháleamos: Sámi mánáid boahtteáigi. Dalle mii álgit vuollegašvuođain ja movttain.

Áššedovdijoavku galgá geiget raportta máhttoministarii geasset 2027.

Lahtut:

  1. Torjer Olsen, jođiheaddji, Romsa      

  2. Inga Lill Sigga Mikkelsen, Romsa/Hábmer                  

  3. Anne Ingebjørg Svineng Eriksen, Kárášjohka

  4. Hege Merete Somby, Hamar

  5. Hadi Strømmen Lile, Oslove
  1. Hilde Dahl Djupnes, Romsa
  1. Åge Roald Eriksen, Snåase
  1. Per Isak Vars, Guovdageaidnu
  1. Johanne Marie Olaussen, Oslove