Historjjálaš vuoruheapmi valáštallandoaimmaide miehtá riikka:

684 miljovnna Norgga valáštallanlihttui 2017:s

Norgga valáštallanlihttui ja olympialaš ja paralympialaš lávdegoddái (NIF) lea stáhtaráđis odne juolluduvvon 684 miljovnna kruvnna speallanruđain valáštallanulbmiliidda 2017:s. Dát lea 24 miljovnna kruvdnasaš lassáneapmi 2016 ektui.

- Juolludeapmi boahtte jagi lea valáštallandoaimmaid historjjálaš vuoruheapmi. Olbmuin galget leat buorit valáštallanfálaldagat doppe gos ásset. Boahtte jagi juolludeamis leat danne poasttat doaimmaid várás mat leat vuoruhuvvon. Seammás mii geahpedat doarjaga NIF guovddášdássái viđain miljovnna kruvnnain boahtte jagi, dadjá kulturministtar Linda Hofstad Helleland.

Doaibmaruhtadeapmi mánáide, nuoraide ja govdavalástallamii nannejuvvo 8 miljovnnain kruvnnain. Dát lassáneapmi lea 3 miljovnna kruvnna eanet go dat maid Norgga valáštallanlihttu bivddii iežas ohcamušas.

- Lea dehálaš áimmahuššat sihke sin geat háliidit vuoruhit gilvvohallanvaláštallama, ja sin geat háliidit hárjehallan- ja doaibmafálaldaga. Danne mii nannet doaibmaruhtadeami mánáide, nuoraide ja govdavaláštallamii 8 miljovnnain kruvnnain, dadjá Helleland.

 

Vuođđodoarjja sierralihtuide nannejuvvo 11 miljovnna kruvnnain. Doarjja galgá addit buoret rámmaeavttuid buriide ja máŋggabealálaš valáštallanfálaldagaide mánáide ja nuoraide valáštallanjoavkkuin.

Njunušvaláštallama vuoruheapmi lasihuvvo 10 miljovnna kruvnnain 2016 ektui. Doarjja galgá veahkehit ain ovdánahttit nana ja oktasaš norgga njunušvaláštallanvuoruheami. Etihkka ja guottuid ovddideaddji antidopenbargu galgá vuoruhuvvot. Vuođđodoarjja NIF:i geahpeduvvo 5 miljovnnain kruvnnain.

- Doarjja NIF guovddášdássái lea lassánan maŋimuš jagiin, seammás go leat ožžon eanet juolludemiid momsabuhtadusa geažil. Danne galgá lasihit supmi doaimmaide ja geahpedit supmi valáštallanbyrokratiijii. Mii dieđihat ahte geahpedat sullii seamma olu dán poasttas 2018:s. Mii oaivvildat ahte NIF:s lea vejolašvuohta beavttálmahttit iežas doaimma, ja ahte sii nagodit čađahit iežaset vuoruhuvvon bargguid geahpeduvvon rámmaiguin, dadjá Helleland.

Juolludusreivves bidjá Kulturdepartemeanta čielga gáibádusaid dasa ahte NIF:s galget leat rahpasat ja galgá leat buoret hálddašeapmi. Ođđajagimánu 1.b. 2017 rájes ferte NIF suovvat olggobeale olbmuid lohkat guovddášhálddašeami rehketdoalu. Stáhtaráđđi bivdá NIF suovvat lohkat maiddái boarrásat rehketdoaluid.

2017 juolludusreivve guovdilastá maiddái buori hálddašeami, guottuid ovddideaddji antidopenbarggu ja barggu oččodit eanet nissonjođiheddjiid valáštallamii.