Albbasnálli lea fas lassáneamen
Historjjálaš arkiiva
Almmustahttináigodat Solberga ráđđehus
Almmustahtti: Dálkkádat- ja birasdepartemeanta
Ođas | Almmustahtton: 16.06.2015 | Maŋimuš ođasmahttojuvvon: 01.07.2015
Albbasnálli lea fas lassánan maŋŋil go dat máŋga jagi leamaš hui vuollin. Dán jagi logut čájehit ahte ovdal bivdoáiggi 2015 ledje 60,5 čivgama Norggas, mii lea uhcit go máddodatmearri mii lea 65 čivgama jahkásaččat. Rovdata diimmá logut čájehedje ahte dalle ledje 53,5 čivgama.
-Albbasnáli lassáneapmi lea buorre ođas. Seammás lea nálli ain vuollelis go máddodatmearri. Dat mearkkaša ahte earrebivddu ferte heivehit nu ahte albbaslohku lassána, cealká dálkkádat- ja birasministtar Tine Sundtoft.
Riikkas leat gávcci iešguđet boraspirehálddašanguovllu, ja čieža guovllus lea albbasnállái mearriduvvon guovlulaš máddodatmearri. Rovdata logut čájehit ahte mihttomeriid olaheapmi molsašuvvá guovllus guvlui. Golbma guovllu leat olahan guovlulaš máddodatmeari.
Regiovdna 2 (Aust-Agder, Buskerud, Telemárku, Vestfold) ja regiovdna 6 (Møre ja Romsdal, Lulli-Trøndelága, Davvi-Trøndelága) lea bajimusas dien skálas. Goappaš regiovnnas lea mihttomearri olahuvvon ahte galget 12 čivgama jahkásaččat ja oktiibuot leat regiovnnas 2 registrerejuvvon 16 albbasbearraša ja regiovnnas 6 fas 17 albbasbearraša.
Regiovdna 5 (Hedemárku) lea fas dilli nuppe láhkai. Hedemárkkus lea máddodatmearri albasiid guovdu 10 čivgama jahkásaččat, muhto doppe lea dušše 2,5 albbasbearraša registrerejuvvon. Albbaslohku fylkkas lea geahpeduvvon vaikko earrebivdu ii leat čađahuvvon guokte maŋimuš jagi. Sivat dasa leat eahpečielgasat.
Jus máddodatmearri ii olahuvvo, meroštuvvon maŋimuš golbma jagi gaskamearálaš loguid vuođul, de lea Birasdirektoráhtas váldi mearridit earrebivddu. Regiovnnas 4 (Akershus, Oslo, Østfold), regiovnnas 5 (Hedemárku), regiovnnas 7 (Nordlánda) ja regiovnnas 8 (Romsa, Finnmárku) ii leat nammagottiin dakkár váldi.
-Stuorámus hástalussan šaddá heivehit albbaslogu nu lahka máddodatmeari go vejolaš. Jahkásaš erohusat guovlluid gaskka eai atte sávvojuvvon einnostahttivuođa ja bohtosiid, eai albbasnállái eaige guohtunealáhusaide, dadjá Sundtoft.