Vuođđosupmi ja penšuvnnaid mudden miessemánu 1. beaivve

Dát sisdoallu lea eanet go 1 jagi boaris. Danne sáhttet dieđut leat boarásmuvvan.

Oadjoságaškuššamat, mat maŋiduvvojedje koronapandemiija geažil, leat čađahuvvon. Álbmotoaju vuođđosubmi lassána 1,5 proseanttain 99 858 kruvnnos 101 351 kruvdnui miessemánu 1. b. 2020 rájes. Muddema vuođđun lea 1,7 proseantta bálkálassáneapmi, seammá go rattusfága bálkášiehtadallamiin.

Oadjosupmit leat ságaškuššojuvvon vuođđosupmi ja penšuvnnaid muddema njuolggadusaid vuođul. Loguid ságaškuššamii leat searvan Pensjonistforbundet, Senior Norge, Forsvarets seniorforbund, Landsforbundet for offentlige pensjonister, Funksjonshemmedes Felles­organisasjon, Samarbeidsforumet av funksjonshemmedes organisasjoner, LO, YS, Unio ja Akademikerne.

- Penšuvnnat čuvvot servodaga bálkáovdáneami buriin áiggiin ja áiggiin mat eai leat nu buorit. Go áigodagas leat hástalusat, ja bálkášiehtadus lea ráddjejuvvon, de dat váikkuha maid penšunisttaide. Penšunisttat ožžot dán jagi penšuvnnaid lasáhussan 1,2 proseantta, dadja bargo- ja sosiálaministtar Torbjørn Røe Isaksen.

Gii oažžu maid?

Ahkepenšuvdna, maid lea dinemin, bargonávccahisvuođaoadju ja eará oajut, mat muddejuvvojit vuođđosupmi vuođul, lassánit 1,50 proseanttain miessemánu 1. beaivvi rájes, olles jagi lassáneapmi lea 2,01 proseantta.

Ahkepenšuvdna, maid leat máksigoahtán, lassána 0,74 proseanttain miessemánu 1. beaivvi rájes, olles jagi lassáneapmi lea 1,2 proseantta. 

Unnimus penšuvdnadási máksomeriid mudden

Ahkepenšunisttaid unnimus penšuvdnadási máksomearit lassánit 0,92 proseanttain. Lassáneami maŋŋá máksomearit leat: 

  • Vuollegaš máksomearri (go beallelaččas/guoimmis lea penšuvdna) lassána 157 171 kruvnnos 158 621 kruvdnui.
  • Dábálaš máksomearri (go beallelaččas/guoimmis lea bargonávccahisvuođaoadju dahje dienas lea badjel 2 V) lassána 181 908 kruvnnos 183 587 kruvdnui.
  • Alla máksomearri (go penšunistta beallelačča/guoimmi dienas lea unnit go 2 V) lassána 191 422 kruvnnos 193 188 kruvdnui.
  • Erenoamáš máksomearri (okto orru olbmui) lassána 202 818 kruvnnos 204 690 kruvdnui.
  • Erenoamáš máksomearri (náittospárra, ealiha beallelačča/guoimmi gii lea badjel 60 jagi ja deavdá beallelašlasáhusa vuoigatvuođa eavttuid) lassána 297 955 kruvnnos 300 704 kruvdnui.

Bargonávccahisvuođaoaju unnimus jahkesubmi muddema maŋŋá 

  • Dábálaš máksomearri: 231 080 kruvnno (2,28 V, go orru ovttas beallelaččain dahje guimmiin)
  • Nuorra bargonávccaheami máksomearri: 270 929 kruvnno (2,66 V, go orru ovttas beallelaččain dahje guimmiin)
  • Alla máksomearri: 251 350 kruvnno (2,48 G, bargonávccaheapmi orru okto)
  • Nuorra bargonávccaheami alla máksomearri: 296 392 kruvnno (2,91 G, bargonávccaheapmi orru okto)

Njuolggadusat

Vuođđosupmi, bargonávccahisvuođaoaju ja ahkepenšuvnna galgá muddet bálkálassáneami ektui, ja dat muddejuvvo vejolaš spiehkasteami mađe, mii lea leamaš einnostuvvon ja duođalaš bálkálassáneami gaskkas guokte maŋimuš jagi.

Ahkepenšuvdna, maid leat máksigoahtán, galgá vuos muddejuvvot seammá bálkálassáneami ektui, ja dasto das geahpeduvvo 0,75 proseanttain.

Ahkepenšunisttaid unnimus penšuvdnadási máksomearit muddejuvvojit seammáin bálkálassánemiin, ja dasto dat muddejuvvojit 67-jahkásaččaid eallinahkemuddema váikkuhusa ektui muddenjagis.

Ođđa vuođđosupmi ja muddensupmiid nannejit formálalaččat gonagaslaš resolušuvnnain čakčamánu 4. beaivve 2020.