Nationála unnitloguid ja guovddáš eiseválddiid gulahallanforum

Almmustahttináigodat Solberga ráđđehus

Almmustahtti: Ođasmahttin-, hálddahus- ja girkodepartemeanta

Gulahallanforum lea deaivvadansadji gos nationála unnitloguid organisašuvnnat ja guovddáš eiseválddit deaivvadit. Forumis ovddiduvvojit unnitloguid oktasašáššit, ja áirasat iešguhtet nationála unnitlogujoavkkuin ožžot vejolašvuođa gaskaneaset divaštallat iešguđetlágan áššiid. Forum lágiduvvo dábálaččat juohke jagi.

Gulahallanforum ásahuvvui 2003:s Eurohpáráđi gohččuma mielde. Foruma ulbmil lea nationála unnitloguid eanet čalmmustahttit, nannet gulahallama unnitloguid ja eiseválddiid gaskka ja addit unnitloguide vejolašvuođa ovddidit iežaset oaiviliid eiseválddiide. Čoahkkimiin almmuhuvvojit maid áigeguovdilis dieđut eiseválddiid bealis.

Gulahallanforumii bovdejuvvojit erenoamážit dat organisašuvnnat mat ožžot vuođđodoarjaga Gielda- ja ođasmahttindepartemeantta doarjjaortnega bokte.

Gulahallanforuma čoahkkimiid lassin lágida departemeanta iešguhtetlágan čoahkkimiid ovtta ja ovtta organisašuvnnain dahje oktanaga buot organisašuvnnaiguin  dárbbu mielde – ovdamearkka dihtii riikkaidgaskasaš konvenšuvnnaid raporteremiid oktavuođas.

 
Gulahallanforuma oasseválddit 2012. (Govva: Ivar Johnsen, Norgga Kvenaid lihttu)

Gulahallanforum 2014

Gulahallanforum lágiduvvui maŋimuš miessemánu 26.-27.b.2014 Oslos, ja das oassálaste organisašuvnnat geat ovddastedje romániálbmoga/táhteriid, vuovdeláttániid, kvenaid/norggasuopmelaččaid, juvddálaččaid ja romálbmoga (sigøynariid). Dan lassin ledje maid áirasat máŋgga departemeanttas ja direktoráhtain. Dán jagáš foruma váldotemá leai vealaheamivuosttaldeapmi ja giella.