Sámi gažaldagaid davviriikkalaš ámmátolbmoorgána njuolggadusat

Almmustahttináigodat

Almmustahtti: Bargo- ja searvadahttindepartemeanta

Mielddus 1

Sámi gažaldagaid davviriikkalaš ámmátolbmoorgána, man ovdalaš namma lei Sámi- ja boazodoalloealáhusgažaldagaid davviriikkalaš ovttasbargoorgána, lea ásahuvvon Davviriikkalaš ráđi ávžžuhusaid vuođul njukčamánu 22.b. 1962:s (13/62) meannudit oktasaš gažaldagaid mat gullet sámiide.

Viidáset leat sámi gažaldagaid ovddasvástideaddji ministarat čoahkkimis cuoŋománu 5.b. 2000:s mearridan ásahit eahpeformálalaš čanastemiin ovttasbarggu Davviriikkalaš ministtarráđiin jámma čoahkkimiiguin gos muitalit, digaštallet ja meannudit sámi gažaldagaid mat leat oktasaš beroštupmin riikkaide.

Sámi gažaldagaid ovddasvástideaddji ministarat ja sámediggepresideanttat leat čoahkkimis skábmamánu 2.b. 2000:s mearridan ásahit ovttasbarggu jámma čoahkkimiiguin gos muitalit, digaštallet ja meannudit sámi gažaldagaid mat leat oktasaš beroštupmin riikkaide.

Organisašuvdna


Ámmátolbmoorgána lea delegašuvdna mas leat unnimusat golbma virgeolbmo ráđđehusain ja Suoma, Norgga ja Ruoŧa sámedikkiin. Iešguhtet gullevaš riikka ráđđehusat, dahje sámi gažaldagaid ovddasvástideaddji ministar, válljejit delegašuvnnaid ja mat maid válljejit delegašuvnna jođiheaddji.

Davviriikkalaš Ministtarráđi ovddasteaddjis lea vuoigatvuohta oassálastit ámmátolbmoorgána čoahkkimiidda.

Barggut


Barggus ahte seailluhit, ovdánahttit ja nannet sámi kultuvrra galgá Ámmátolbmoorgána meannudit buot sámi oktasaš gažaldagaid mat ovdánahttet sámi álbmoga giela, kultuvrra, ealáhusaid ja servodateallima.

Ámmátolbmoorgána galgá ráhkkanahttit áššiid čoahkkimiidda gaskal ministariid ja čoahkkimiidda gaskal ministariid ja sámediggepresideanttaid. Ovddasvástádus gohččut  ministtarčoahkkimiidda ja daid jođihit galget riikkat gaskaneaset vuoruid mielde váldit badjelasas. Gullevaš riikkaid delegašuvnnain galgá leat čállingottedoaimma ovddasvástádus ministtarčoahkkimiidda ja čoahkkimiidda gaskal ministariid ja sámediggepresideanttaid.

Ámmátolbmoorgána galgá iešguhtet riikka ráđđehusa dahje sámedikki ávžžuhusa vuođul addit evttohusaid ja buktit oaiviliid fáttáin maid Ámmátolbmoorgána lea meannudan.

Ámmátolbmoorgána galgá juohkit dieđuid Davviriikkalaš Ministtarráđi čállingoddái áššiid birra mat váldojuvvojit ovdan ministtarčoahkkimiin ja čoahkkimiin gaskal ministariid ja sámediggepresideanttaid.

Áššiid meannudeapmi

§ 3
Ámmátolbmoorgána čoahkkana dárbbu mielde, dattetge unnimusat oktii jahkái.


Ámmátolbmoorgána sáhttá ovdal ášševálbmema válljet guorahalli gean bargun lea ráhkkanahttit ášši Ámmátolbmoorgána meannudeapmái.

Guorahalli sadjái sáhttá válljet erenoamáš joavkku mii galgá ráhkkanahttit ášši.

Guorahalli dahje bargojoavku berre buktit guorahallama ja ákkastallojuvvon mearrádusevttohusa.


Juohke riika máksá iežas Ámmátolbmoorgána goluid.

Goluid juohkin erenoamáš bargguid dahje guorahallamiid dáfus dahkkojuvvo erenoamaš šiehtadusa vuođul gaskal delegašuvnnaid.


Čoahkkimiin čállojuvvo beavdegirji, mii galgá sisttisdoallat čilgehusa das mii lea ovdanboahtán čoahkkimis ja makkár mearrádusaid leat dahkan.

Eará mearrádusat


Delegašuvnnat galget áigodagas gaskal čoahkkimiid juohkit dieđuid nubbi nubbái áigeguovdilis gažaldagain mat gullet Ámmátolbmoorgána bargosuorgái.


Ámmátolbmoorgána beavdegirji ja mearrádusat sáddejuvvojit gullevaš riikkaid ráđđehusaide, sámedikkiide, Davviriikkalaš ministtarráđi čállingoddái ja guoskevaš davviriikkalaš orgánaide. Juohke riikka delegašuvdna juohká dieđuid guoskevaš našuvnnalaš eiseválddiide ja orgánaide Ámmátolbmoorgána doaimmaid birra.

Dát njuolggadusat, mat dahkkojuvvojedje skábmamánu 7.b. 2001:s, bohtet daid mearrádusaid sadjái mat dahkkojuvvojedje skábmamánu 12.b. 1991:s.