Ruhtapolitihkka

Almmustahttináigodat

Almmustahtti: Ruhtadandepartemeanta

Norgga báŋku lea riikka guovddášbáŋku, ja dan ovddasvástádus lea ruhtapolitihka jotkkolaš ollašuhttin. Norgga báŋku lea sierra riektesubjeakta, maid stáhta oamasta, ja dan doibmii guoská miessemánu 24. b. 1985' láhka nr. 28 Norgga báŋkku ja ruhtavuogádaga birra (Guovddášbáŋkoláhka), ja dasa gullevaš láhkaásahusat.

Norgga báŋku lea riikka guovddášbáŋku, ja dan ovddasvástádus lea ruhtapolitihka jotkkolaš ollašuhttin. Norgga báŋku lea sierra riektesubjeakta, maid stáhta oamasta, ja dan doibmii guoská miessemánu 24. b. 1985' láhka nr. 28 Norgga báŋkku ja ruhtavuogádaga birra (Guovddášbáŋkoláhka), ja dasa gullevaš láhkaásahusat. Báŋku galgá ollašuhttit ruhta-, kredihtta- ja valuhtapolitihka ja leat ráđđeaddi orgána dan hárrái. Dat galgá ráhkadahttit báberruđaid ja šlánttiid, ovddidit beaktilis máksinvuogádaga riikka siskkobeallái ja olgoriikka ruhtarávnnjiide ja gozihit ruhta-, kredihtta- ja valuhttamárkaniid. Báŋku galgá doaimmahit barggus ekonomiijapolitihka njuolggadusaid mielde, maid stáhta eiseválddit leat nannen, ja čuovvut riikkaidgaskasaš geatnegasvuođaid, mat čatnet riikka. Gonagas mearrida kursavuogádaga áššiid, mat gusket kruvdnui ja kruvnno kurssa rievdadusaide.

Njukčamánu 29. b. 2001 láhkaásahusa vuođul galgá ruhtapolitihkain viggat norgga kruvnnu dássidis árvui riikka siste ja min gávpeguimmiid oktavuođas. Ruhtapolitihkka galgá seammás doarjut ruhtadanpolitihka dan láhkai, ahte dat stáđásmahttá buvttadeami ja barggolašvuođa ovdáneami. Ruhtapolitihka doaibmi ollašuhttimis galgá dan vuođul ovddidit vuollegaš ja stáđis inflašuvnna, maid meroštallet konsumhattiid jahkásaš badjáneapmin, mii guhkes áigodagas lea lagabui 2,5 proseantta. Eaktuduvvo, ahte konsumhatti badjáneapmi lea dábálaččat intervállas +/- 1 proseantačuokkis ulbmila goabbat bealde. Ruhtapolitihka ollašuhttimis galgá geahččat ovddos guvlui, iige das galgga darvánit gaskaboddasaš hehttejumiide, mat eai dáidde váikkuhit hadde- ja gollobadjáneapmái, mii lea vuođđun.

Eanet ruhtapolitihka birra muitala Sd.dieđ. nr. 29 (2000-2001), mas leat ekonomiijapolitihka njuolggadusat. Ruhtapolitihka ollašuhttimis čilgejuvvo vuđolaččat 2008 nationálabušeahtas ja 2007 kredihttádieđáhusas.