UNESCO konvenšuvdna sávrudanávdnasiid vuostá

UNESCO konvenšuvdna sávrudanávdnasiid vuostá valáštallamis bođii fápmui 2007:s. Soahpamuš geatnegahttá eiseválddiid láhčit dili dasa ahte beaktilit bargat sávrudanávdnasiid geavaheami vuostá valáštallamis. Konvenšuvdna bidjá rámmaid dasa movt oktiiheivehit sávrudanávnnasnjuolggadusaid  ja -politihka riikkaidgaskasaš dásis.

Norga lea ratifiseren šiehtadusa.

Valáštallanovttasbargu Eurohpáráđi bokte

Departemeanttas lea ovddasvástádus Norgga valáštallanovttasbarggus man Eurohpáráđđi jođiha.

Eurohpáráđi mihttomearri valáštallansuorggis lea ovddidit dorvvolaš ja ehtalaš valáštallama eurohpálaš oktasaš árvvuid ja prinsihpaid mielde. Eurohpáráđđi galgá veahkkin eastadit valáštallama negatiiva beliid. Dat dahkko valáštallama viiddiduvvon oassešiehtadusa bokte (EPAS), ja sávrudanávdnasiid vuosttildeami konvenšuvnna bokte (The Anti-Doping Convention), valáštallandoaluid oadjebasvuođa ja sihkarvuođa konvenšuvnna bokte (Convention on an Integrated Safety, Security and Service Approach at Football Matches and Other Sports Events) ja valáštallangilvvuid manipulerema konvenšuvnna bokte (The Convention on Manipulation of Sports Competitions).

Norga lea miellahttu EPAS:s ja lea ratifiseren konvenšuvnnaid.

Davviriikkalaš ovttasbargu valáštallansuorggis

Davviriikkalaš valáštallanministarat vuolláičálle golggotmánus 2003 ”Davviriikkaid ráđđehusaid valáštallanovttasbargojulggaštusa”. Julggaštus doarju valáštallansuorggi viiddis ovttasbarggu mii jođihuvvo eiseválddiid dásis ja man davviriikkaid valáštallanministarat mearridedje ja vuolláičálle vuohččan 1994:s. Julggaštusa vuođđun lea oktasaš ipmárdus valáštallama mearkkašumis servodahkii. Ovttasbarggu vuođđun lea árvvusatnit eaktodáhtolaš áŋgiruššama valáštallansuorggis, ja valáštallanorganisašuvnnaid demokráhtalaš iešheanalašvuohta riikkadásis ja riikkaidgaskasaččat.

Dehálaš oassi ovttasbarggus lea lonohallat vásáhusaid ja digaštallat áigeguovdilis valáštallanpolitihkalaš gažaldagaid. Dat dahkko čoahkkimiin mat áiggis áigái ain lágiduvvojit ámmátvirgeolbmáid dásis. Valáštallanovttasbarggus deattuhit oktiiheivehit davviriikkalaš oainnuid ja oaiviliid riikkaidgaskasaš ovttasbargoásahusain.

Searvan CEN-bargui – Eurohpálaš standardiserenlávdegoddi

Norga lea Standard Norge bokte miellahttun eurohpálaš standardiserenlávdegottis CEN (Comité Européen de Normalisation) ja lea mielde eurohpálaš standárddaid hábmenbarggus iešguđetge fágasurggiin. Departemeanta oassálastá dán barggus valáštallanrusttegiid fágasuorggis.

Dehálaš mihttomearit lea gávnnahit standardiserejuvvon čovdosiid mat gusket funkšunalitehtii, sihkarvuhtii ja birasáššiide. Stuorimus doaibma dál lea dain lávdegottiin ja joavkkuin mat leat ráhkadeame standárddaid valáštallanvuložiidda ja tribunarusttegiidda. Standard Norga lea vásttolaš almmuhit dán fágasuorggi standárddaid Norggas, ja koordineret dán barggu.