Gelbbolašvuođa jierpmálaš geavaheapmi

2040 Dearvvašvuođabargiidplána láhčá maiddái dili olu eanet ovddasvástádus- ja bargojuogadeapmái.

– Mii fertet diktit dearvvašvuođabargiid geavahit iežaset gelbbolašvuođa. Dás lea sáhka bargiid motiveremis ja ovddideamis, muhto maiddái ahte gelbbolašvuohta geavahuvvo buoremusat ávkin pasieanttaide, geavaheddjiide ja oapmahaččaide. Danne háliidit mii earret eará rahpat viiddiduvvon čujuhan- ja bearranrievtti, eanet dearvvašvuođabálvalusaid apotehkas ja sierra áššebealleovttastahttojuvvon prográmma ovddasvástádus- ja bargojuohkima várás, dadjá dearvvašvuođa- ja fuolahusministtar Jan Christian Vestre.

Plána mielde galgat dasa lassin rekrutteret bargiid, geain ii leat formála oahppu, bargat dakkár bargguid dearvvašvuođa- ja fuolahusbálvalusain, mat eai gáibit dearvvašvuođafágalaš oahpu. 

Jierpmálaččabut bálvalusat

2040 Dearvvašvuođabargiidplánas leat olu doaibmabijut mat galget álkidahttit logistihka, jávkadit áigesuollagiid dearvvašvuođabargiin ja ovdánahttit neavvuid mat geahpedit dárbbu dearvvašvuođabálvalusaide.

Ráđđehus háliida ásahit digitála vuosttašlinjjá mas álbmot sáhttá ieš viežžat veahki, mii sáhttá geahpedit bálvalusaid. Leat maiddái evttohan čađahit digitála ovttastahttináŋgiruššama, vai sáhttá juogadit dieđuid rastá bálvalusaid. Dat sáhttá geahpedit dearvvašvuođabargiid áigegeavaheami dieđuid ohcamis. 

Beaktilis resursageavaheapmi ja vuoruheapmi

Bargoveahkadárbbu sáhttá geahpedit beaktileappot resursageavaheami bokte bálvalusain.

Ovdamearkka dihte áigu ráđđehus ovdánahttit buori mearridandoarjaga dearvvašvuođabargiide vai unnida badjelmeare dikšuma dahje dárbbašmeahttun bargiidintensiiva divššu, go leat buorit molssaeavttut. 

Unnidit dárbbu visttiid ja ulbmillaš lokaliserema bokte

Areálaid ja visttiid hábmen ja lokaliseren sáhttá váikkuhit iešhálddašeapmái, beaktilvuhtii bálvalusain ja bargiiddárbui. Danne leat visttit sierra áŋgiruššansuorgi 2040 Dearvvašvuođabargiidplánas.

Lassin bidjat váikkuhangaskaomiid láhčit dili buriid ássanfálaldagaide, jierpmálaččabut organiseret ruovttubálvalusaid, ja veahkehit plánet ja eastadit veahá eambbo go dál.

Ráđđehus áigu earret eará joatkit doarjut viesuid ahkeheivehuvvon ođastemiid boarrásiid várás, geahčadit Viessobáŋkku njuolggadusaid ja bagadusa investerendoarjaga hárrái, geahččaladdat ođđa ássanhámiid ja lagabui geahčadit doaibmabijuid eanet ahkeheivehuvvon viesuide.

Plána viidásit geaidnu

Plána doaibmabijut leat vuođđuduvvon cealkámušaide ja gulahallamii earret eará bargoaddiiguin ja bargiiguin, ja maiddái oapmehaččaiguin, pasieanttaiguin ja geavaheddjiiguin.

Buohcciviesut galget čuovvolit plána jahkásaš stáhtabušeahta barggahanreivviid ja juolludusaid bokte.

Ráđđehus lea almmuhan stuorát nuppástuhttindoarjaga suohkaniidda, maid suohkanat sáhttet ohcat, ja mii galgá veahkehit addit dárbbašlaš doaibmanvejolašvuođaid čuovvolit doaibmabijuid. Dearvvašvuođadirektoráhtta oažžu rollan doarjut viidáseappot ovddideami ja buorebut ovttastahttit digitála neavvuid gelbbolašvuođaplánema várás, vai dat buorebut doibmet doarjjan plánemis ja čuovvoleamis bálvalusdásiid rastá.