Ollesáiggelokten ja bargoáigi

Plánas leat roavvát meroštallan evttohuvvon doaibmabijuid vejolaš váikkuhusaid. Dat ovttaskas doaibmabidju mas sáhttá stuorámus váikkuhus bargoveahkafálaldaga lasiheapmái, lea stuoridit virgeproseantta dearvvašvuođa- ja fuolahusbálvalusbargiide geat dál eai bargga ollesáiggevirggis.  

– Dearvvašvuođa- ja fuolahussuorggis leat olu oasseáiggevirggit, ja eambbogat háliidit ollesáigge, bistevaš virggiid. Go buot virgeproseanttaid lokte 10 proseanttain buot ahke-ja oahpahusjoavkkuin, de sáhttet šaddat gitta 22 000 lassi jahkebarggu 2040:s. Dás leat stuora vejolašvuođat, danne mii háliidit ovttasbargat bargoeallima áššebeliiguin ollesáiggeloktemiin, vai eambbogat besset bargat stuorát virgeproseanttas ja áinnas ollesáiggevirggiin, dadjá dearvvašvuođa- ja fuolahusministtar Jan Christian Vestre. 

Ráđđehus háliida maiddái bovdet bargoeallima áššebeliid ovttasbargui bargoáiggi birra.

– Bargoáiggegažaldaga ferte geahččat bargoveaga ja ollesáiggi oktavuođas, ja dan fertet ovttasráđiid čoavdit. Mii áigut bovdet bargoeallima áššebeliid prosessii mas čielggadit ja ráđđádallat eavttuid ja vejolaš čovdosiid mot organiseret suorggi bargoáiggi ja vahkkoloahppabarggu, dadjá Vestre.

Stáđđásit vuođđobargoveahka ja unnit buozalmasvuođajávkan

Ráđđehus almmuha maiddái máŋga doaibmabiju unnidan dihte buozalmasvuođajávkama dearvvašvuođa- ja fuolahusbálvalusas. Dán áŋgiruššansuorggi doaibmabijut leat earret eará mentor- ja fáttarortnegiid ja jođihanmodeallaid birra.

– Stáđđásit vuođđobargoveahka livččii buohkaide buorrin. Dat addá buoret diehttevašvuođa jođiheddjiide, bargiide ja earenoamážit pasieanttaide, geavaheddjiide ja oapmahaččaide. Danne mii háliidit čovdosiid mat sihkkarastet stáđđásit vuođđobargoveaga ja unnidit sisaláigoheami ja sadjásaččaid geavaheami, dadjá Vestre.

Fágalaš jođiheapmi bálvalusain

Lassin háliida ráđđehus ásahit fágalaš jođihanmodeallaid dearvvašvuođa- ja fuolahusbálvalusaide.

– Jođiheapmi lea áibbas dárbbašlaš geasuheaddji bargosajiid ja buriid bálvalusaid ásaheamis, ja unnida maiddái buozalmasvuođajávkama. Danne mii háliidit suorggi jođiheddjiide addit čielgaseappot rámmaid ja buoridit sin eavttuid dahkat rievdadusaid mat mielddisbuktet ceavzilis bálvalusa maiddái boahtteáiggis, dadjá dearvvašvuođa- ja fuolahusministtar Vestre.

Plána viidásit geaidnu

Plána doaibmabijut leat vuođđuduvvon cealkámušaide ja gulahallamii earret eará bargoaddiiguin ja bargiiguin, ja maiddái oapmahaččaiguin, pasieanttaiguin ja geavaheddjiiguin.

Buohcciviesut galget čuovvolit plána jahkásaš stáhtabušeahta barggahanreivviid ja juolludusaid bokte.

Ráđđehus lea almmuhan stuorát nuppástuhttindoarjaga suohkaniidda, maid suohkanat sáhttet ohcat, ja mii galgá veahkehit addit dárbbašlaš doaibmanvejolašvuođaid čuovvolit doaibmabijuid. Dearvvašvuođadirektoráhtta oažžu rollan doarjut viidáseappot ovddideami ja buorebut ovttastahttit digitála neavvuid gelbbolašvuođaplánema várás, vai dat buorebut doibmet doarjjan plánemis ja čuovvoleamis bálvalusdásiid rastá.