Dárbu bargiide dearvvašvuođa- ja fuolahusbálvalusas stuorru johtileappot go bargiidlohku. Jus ná joatká, de SSB einnostusaid mielde váilot 42 400 dearvvašvuođabargi dearvvašvuođa- ja fuolahusbálvalusain 2040:s.

– Maiddái boahtteáiggis šaddá stuora dárbu dearvvašvuođa- ja fuolahusbálvalusaide, earenoamážit suohkaniin. Ja guhká lea leamaš sáhka lassáneaddji dárbbus dearvvašvuođabargiide. Ráđđehusa 2040 Dearvvašvuođabargiidplánain mii sirdit statistihkain ja einnostusain plánii, mas leat 150 konkrehta doaibmabiju dasa mot bisuhit ja rekruteret fágaolbmuid bálvalussii. Ii gávdno eaŋkildoaibma mii sáhttá addit doarvái fágaolbmuid eaŋkildoaimmain, danne mii fertet čađahit máŋga doaimma oktanaga, dadjá Vestre. 

2040 Dearvvašvuođabargiidplána lea dieđihuvvon dehálaš oassin ráđđehusa Plánas Norgga várás. Doaibmabijut mat dál ovdanbuktojit leat juhkkon guovtti váldojovkui:

  • Doaibmabijut mat galget lasihit bargoveahkafálaldaga, dás deattuhuvvojit bargoeavttut ja oahppu.
  • Doaibmabijut mat galget unnidit bargoveahkadárbbu, dás deattuhuvvojit ovddasvástádus- ja bargojuohkimat, digitaliseren ja goanstajierbmi, beaktilis resursageavaheapmi ja vuoruheapmi, ja visttit. 

– Oktiibuot mii sáhttit plána doaibmabijuiguin unnidit dan erohusa gaskal das galli bargái šaddá dárbu ja galle bargi leat oažžumis, dadjá Vestre.  

Govus čájeha mot iešguđetge doaibmabijut 2040 Dearvvašvuođabargiidplánas sáhttet váikkuhit bargoveaga lasiheapmái, ja seammás unnidit dárbbu 2040 rádjái.
Govus čájeha mot iešguđetge doaibmabijut 2040 Dearvvašvuođabargiidplánas sáhttet váikkuhit bargoveaga lasiheapmái, ja seammás unnidit dárbbu 2040 rádjái. Doaibmabijut fálaldatbealis sisttisdollet eanet oahpahuskapasitehta, alit virgeproseantta, eanet vahkkoloahppabarggu, unnit buozalmasvuođajávkama, heaitima maŋideami maŋŋel 62 jagi, ja eanet jahkebarggut bargiin geat leat badjel 60 jagi. Dárbbu sáhttá unnidit teknologiijain, buoret ovddasvástádus- ja bargojuohkimiin ja beaktilet resursageavahemiin. Oktiibuot čájeha govus stuora vejolašvuođa unnidit bargoveahkahástalusaid. (Govvateaksta lea vižžon 2040 Dearvvašvuođabargiidplánas s. 11.) Govva: Dearvvašvuođa- ja fuolahusdepartemeanta

Plána fátmmasta buot bargiidjoavkkuid

2040:s dárbbašuvvojit, dálá bargoveaga málle mielde, 170 000 bargi earret daid stuorámus dearvvašvuođabargiidjoavkkuid, maidda mis leat ovdalgihtii einnosteamit. Dat leat 44 500 jahkebarggu eanet go otná dássi. Dát leat bargit geat leat áibbas dárbbašlaččat bálvalusain, muhto geaidda mis dál eai leat fálaldateinnosteamit.  

– Mii dárbbašit olles bargoveaga fárus, danne sisttisdollet plána doaibmabijut buot dearvvašvuođabargiidjoavkkuid maid dárbbašit vai sihkkarastit nu buori dearvvašvuođa- ja fuolahusbálvalusa go vejolaš, dadjá Vestre. Stuoradiggi galgá meannudit 2040 Dearvvašvuođabargiidplána 2026 čavčča, ja dearvvašvuođa- ja fuolahusministtar háliida sihkkarastit viiddis politihkalaš ovttamielalašvuođa plána doaibmabijuide.

– Dás lea sáhka oadjebasvuođas dearvvašvuođas, sihke pasieanttaide, geavaheddjiide ja oapmahaččaide. Bargiide galgá almmolaš dearvvašvuođa- ja fuolahusbálvalus leat bargosadji gos bargit vásihit ahte sii hálddašit barggu, besset fágalaččat ovdánit ja gos lea oadjebas bargoárgabeaivi. Suorggi jođiheddjiide mii galgat fállat buoret neavvuid  ja rámmaeavttuid dárbbašlaš rievdademiide mat sihkkarastet ceavzilis dearvvašvuođa- ja fuolahusbálvalusa maiddái boahtteáiggis, dadjá Vestre.

Doaibmabijuid vejolaš váikkuhusat

Mii leat meroštallan vejolaš váikkuhusaid 2040 Dearvvašvuođabargiidplána iešguđetge áŋgiruššansurggiin ja doaibmabijuin. Meroštallamat čájehit ahte:

  • Teknologiija, ovddasvástádus- ja bargojuogadeapmi, ja beaktilit resursageavaheapmi sáhttá unnidit dárbbu 17 300 jahkebargguin.
  • Nannosit oahpahuskapasitehta sáhttá addit 6 500 eanet jahkebarggu
  • Stuorit virgeproseanta (10 proseanttain) sáhttá addit gitta 22 000 eanet jahkebarggu
  • Bargoáigeortnegiid rievdadeapmi vahkkoloahppabarggus sáhttá addit gaskal 3 100 ja 6 400 eanet jahkebarggu
  • Maŋidit heaitima (1 gitta 3 jagi maŋŋel 62 jagi) sáhttá addit gaskal 4 300 ja 13 200 jahkebarggu.
  • Oččodit eanebuid badjel 60 jagi bargat bálvalusain sáhttá addit gaskal 3 400 ja 8 200 eanet jahkebarggu
  • Unnidit buozalmasvuođajávkama sáhttit addit gaskal 2 400 ja 4 800 eanet jahkebarggu

Mearkkašupmi: Váikkuhusaid ii sáhte njuolgut summeret oktii, dannego dat badjálastet ja váikkuhit nubbi nubbái. Meroštallamat leat oaivvilduvvon čájehit man stuorrát váikkuhusat sáhttet leat ja man olu sáhttá olahit.

Fálaldagaid ja dárbbu erohusa loguin leat meroštallan referánsasuorggi eavttuid vuođul ja daid ferte dulkot várrogasat.
Fálaldagaid ja dárbbu erohusa loguin leat meroštallan referánsasuorggi eavttuid vuođul ja daid ferte dulkot várrogasat. Gaskka sturrodat boahtá earret eará bálvalusaid gelbbolašvuođačoahkkádusaid eavttuin, das maid mot bargoveahkadárbu juogaduvvo iešguđetge oahppojoavkkuid gaskkas. SSB analysas leat dán juohkima vuođđojagi 2024 áicojuvvon barggahusoasit ja dat vurdojuvvojit bissut rievdatkeahttá áiggi badjel. Rievdadusat ovddasvástádus- ja bargojuogadeamis, gelbbolašvuođajuogadeamis, organiseremis, teknologiijas ja eará eavttuin sáhttet dan geažil dagahit eará meroštallamiid erohusain. (Govvateaksta lea vižžon 2040 Dearvvašvuođaplánas siidu 17.) Govva: Dearvvašvuođa- ja fuolahusdepartemeanta

Neahtta-tv «Helsepersonellplan 2040»

Geahča sáddaga dás

Geahča sáddaga dás