100 miljovnna reálafágaáŋgiruššamii skuvllas

Ráđđehus árvala geavahit badjel 100 miljovnna kruvnnu ođđa doaibmabijuide čoavdit váttisvuođaid reálafágaid oahpahusas.

-Menddo ollu oahppit eai oahpa matematihka ja luonddufágaid vuođđogálggaid. Ráđđehus árvala dan geažil lasihit mánáidskuvlii ovtta diimmu luonddufága vahkus ja ulbmillaš doaibmabijuid buoridit oahpahusa reálafágas, cealká máhttoministtar Torbjørn Røe Isaksen. 

Dat lea gielddaid duohken mearridit galgá go vahkkosaš luonddufágadiibmu biddjot 5., 6., dahje 7. dássái. Haddelihppu šaddá 80 miljovnna kruvnnu jagi 2016, ja 190 miljovnna jagi 2017 rájes. Dan lassin galgá reálafágaáŋgiruššan lasihuvvot 20 miljovnna kruvnnuin. Ráđđehus áigu ruđaid geavahit viiddidit reálafágagielddaid ortnega, nannet fálaldagaid erenoamáš čeahpes ohppiide ja lasihit doaibmabijuid mat buoridit oahppama sis geat rahčet reálafágain. 

20 miljovnna kruvnnu lohkan- ja čállindoaimmaide

Ráđđehus áigu buoridit giella-, lohkan- ja čállinoahpahusa mánáidgárddiin ja vuođđoskuvllas. 20 miljovnna kruvnnu lea várrejuvvon nannet oahpaheddjiid ja mánáidgárdebargiid gelbbolašvuođa. Áŋgiruššan galgá erenoamážit vuhtiiváldit gánddaid, unnitlogugielat mánáid, ohppiid geain leat lohkan- ja čállinváttut ja erenoamáš čeahpes ohppiid. 

1,1 miljárdda joatkkaohppui

Ráđđehus joatká ain viiddis oahpaheddjiid lassi- ja joatkkaoahpu áŋgiruššama. Dat mearkkaša ahte maiddái 2016 galget várrejuvvot 5050 saji oahpaheddjiid joatkkaohppui, ja stipeanda- ja sadjásašortnet galgá maid viidásetfievrriduvvot. Dat mearkkaša ahte bušeahtta lassána 148 miljovnna kruvnnuin jagi 2016.  

Eanet ruhta skuvlavisttiide

2009 stáhtabušeahtas ásahuvvui reantobuhtadusortnet skuvllaid ja vuojadanrusttegiid várás. Gielddat ja fylkkagielddat besse gávcci jagis váldit loanaid oktiibuot 15 miljárdda kruvnnu ovddas, ja stáhta galggai reanttuid máksit olles loatnasupmis. Ráđđehus árvala 2016 bušeahtas ahte gielddat ja fylkkagielddat ožžot lonet oktiibuot 1,5 miljárdda kruvnnu divodit skuvllaid ja vuojadanrusttegiid. Stáhta golut šaddet 7,5 miljovnna kruvnnu 2016:s. Dáinna árvalusain lea 15 miljárdda sturrosaš investerenrámma sajis. 

Doaibmabijut eastadit givssideami

Sullii 40 miljovnna kruvnnu lea várrejuvvon ovddidit buorre oahppanbirrasa skuvllain ja mánáidgárddiin.  Earret eará galgá ođđa neahttaportála ráhkaduvvot gos gávdnojit praktihkalaš dieđut mánáid, nuoraid ja váhnemiid vuoigatvuođaid birra, ja dieđut gos oažžut veahki jos vásihit givssideami. Ruhtadoarjja givssidanprográmmii jotkojuvvo, ja nu maiddái  doarjagat báikkálaš joavkkuide mat galget heađuštit givssideami.

RÁĐĐEHUSA STÁHTABUŠEAHTTAÁRVALUS 2016
Viiddis áŋgiruššan oahpaheddjiid ovdii
1,1 miljárdda kruvnnu oahpaheddjiid joatkkaohppui 
5000 saji oahpaheddjiid joatkkaohppui 2016:s